എല്ലാവർക്കും നമസ്കാരം. ഇന്ന് നമ്മുടെ കേരളം എത്തിനിൽക്കുന്നത് വളരെ വിചിത്രമായ ഒരു അവസ്ഥയിലാണ്. ഒരു വശത്ത് ലോകം കണ്ട ഏറ്റവും വലിയ വികസനമാണ് ഇവിടെ നടക്കുന്നത് എന്ന് മുഖ്യമന്ത്രി പിണറായി വിജയനും സംഘവും പ്രസംഗിക്കുന്നു, മറുഭാഗത്ത് സർക്കാർ ഓഫീസുകളിലെ ബില്ലുകൾ മാറാൻ പണമില്ലാതെ ട്രഷറികൾ പൂട്ടുന്നു. സത്യത്തിൽ എന്താണ് ഇവിടെ സംഭവിക്കുന്നത് എന്ന് സാധാരണക്കാർക്ക് മനസ്സിലാകുന്ന ഭാഷയിൽ പറഞ്ഞാൽ, കടം വാങ്ങി നെയ്യ് കുടിച്ച് ഒടുവിൽ കടം തരുന്നവൻ വീട്ടുമുറ്റത്ത് വന്നു നിൽക്കുന്ന അവസ്ഥയിലാണ് നമ്മുടെ സംസ്ഥാനം. ഈ മാസം മാത്രം രണ്ടുതവണയായി 3000 കോടി രൂപയാണ് സർക്കാർ കടമെടുത്തത്. ഇത്രയും വലിയ തുക കൈയ്യിൽ വന്നിട്ടും സാധാരണക്കാരനായ ഒരു കരാറുകാരന് കൊടുക്കാൻ സർക്കാരിന്റെ കൈയ്യിൽ പണമില്ല എന്ന് പറയുമ്പോൾ അതിന്റെ പിന്നിലെ കെടുകാര്യസ്ഥത എത്രത്തോളമുണ്ടെന്ന് നമ്മൾ ചിന്തിക്കണം.
ഇപ്പോൾ പുറത്തുവരുന്ന വാർത്തകൾ പ്രകാരം ട്രഷറി ഓഫീസർമാർക്ക് മുകളിൽ നിന്ന് ഒരു രഹസ്യ നിർദ്ദേശം കിട്ടിയിരിക്കുകയാണ്. 25 ലക്ഷം രൂപയ്ക്ക് മുകളിലുള്ള ഒരു ബില്ലും പാസാക്കരുത് എന്നാണ് ആ നിർദ്ദേശം. അതായത്, സർക്കാരിന് വേണ്ടി പണി ചെയ്ത ഒരു കരാറുകാരന് ഒരു കോടി രൂപ കിട്ടാനുണ്ടെങ്കിൽ അയാൾക്ക് ഇപ്പോൾ വെറും 25 ലക്ഷം കിട്ടിയാൽ ഭാഗ്യം, ബാക്കി തുക എന്ന് കിട്ടുമെന്ന് ആർക്കും അറിയില്ല. ശനിയാഴ്ച രാവിലെ വരെ അഞ്ച് കോടി രൂപ വരെയുള്ള ബില്ലുകൾ മാറാം എന്നായിരുന്നു പറഞ്ഞിരുന്നത്. എന്നാൽ ഉച്ചയായപ്പോഴേക്കും ഖജനാവ് കാലിയാണെന്ന് ബോധ്യപ്പെട്ടതോടെ അത് പെട്ടെന്ന് 25 ലക്ഷമാക്കി കുറച്ചു. പാവം ഉദ്യോഗസ്ഥരും കരാറുകാരും എന്തുചെയ്യണമെന്നറിയാതെ കുഴങ്ങുകയാണ്. തിങ്കളാഴ്ച ഉച്ചയോടെ ട്രഷറിയിലെ ഇടപാടുകൾ പൂർണ്ണമായും നിർത്താനാണ് പ്ലാൻ. അതായത് സാമ്പത്തിക വർഷം അവസാനിക്കാൻ ദിവസങ്ങൾ ബാക്കി നിൽക്കേ സർക്കാർ കൈമലർത്തുകയാണ്.
ഇവിടെയാണ് നമ്മുടെ ധനമന്ത്രി കെ.എൻ. ബാലഗോപാലിന്റെ പ്രകടനം നമ്മൾ കാണേണ്ടത്. കേന്ദ്രം പൈസ തരുന്നില്ല, കേന്ദ്രം നമ്മളെ ശ്വാസം മുട്ടിക്കുന്നു എന്നൊക്കെയാണ് അദ്ദേഹത്തിന്റെ സ്ഥിരം പല്ലവി. കേന്ദ്രത്തിന്റെ വിഹിതത്തിൽ കുറവുണ്ടായിരിക്കാം, പക്ഷേ കിട്ടുന്ന പണമൊക്കെ എങ്ങോട്ടാണ് പോകുന്നത്? നികുതി പിരിക്കുന്ന കാര്യത്തിൽ സർക്കാർ പരാജയമാണെന്ന് എല്ലാവർക്കും അറിയാം. എന്നാൽ സർക്കാരിന്റെ ആഡംബരങ്ങൾക്കോ മന്ത്രിമാരുടെ വിദേശ യാത്രകൾക്കോ പുതിയ കാറുകൾ വാങ്ങുന്നതിനോ യാതൊരു പഞ്ഞവുമില്ല. ഖജനാവിൽ എലി ഓടുമ്പോഴും ഹെലികോപ്റ്റർ വാടകയ്ക്ക് എടുക്കാനും കോടികൾ പൊടിച്ച് വിദേശത്ത് പോയി പശുവിനെ കറക്കാൻ പഠിക്കാനും നമുക്ക് പണമുണ്ട്. സാധാരണക്കാരന്റെ പെട്രോളിനും മദ്യത്തിനും സെസ് അടിച്ച് ഏൽപ്പിക്കുമ്പോൾ പറഞ്ഞത് കേരളത്തെ രക്ഷിക്കാനാണെന്നാണ്. ഇപ്പോൾ ആ പണമൊക്കെ എവിടെ പോയി എന്ന് ചോദിച്ചാൽ മന്ത്രിമാർക്ക് ഉത്തരമില്ല.
കരാറുകാർ വലിയ പ്രതിസന്ധിയിലാണ്. അവർ പലിശയ്ക്ക് പണമെടുത്ത് സർക്കാരിന്റെ പണികൾ പൂർത്തിയാക്കുന്നു, പക്ഷേ പണി കഴിഞ്ഞു ബില്ല് സമർപ്പിക്കുമ്പോൾ സർക്കാർ പറയും “അടുത്ത കൊല്ലം നോക്കാം” എന്ന്. ഇത് വെറും സാമ്പത്തിക പ്രതിസദ്ധിയല്ല, ഇതൊരു ഭരണപരമായ പരാജയമാണ്. ഏപ്രിൽ മാസമായാൽ വീണ്ടും കടമെടുക്കാം എന്നാണ് സർക്കാർ കണക്കുകൂട്ടുന്നത്. അതായത് ഒരു കടം വീട്ടാൻ അടുത്ത കടം എടുക്കുക. വരും തലമുറയെ മുഴുവൻ കടക്കാരാക്കി മാറ്റിക്കൊണ്ട് എന്ത് വികസനമാണ് ഇവർ ഈ പറയുന്നത്? പഞ്ചായത്തുകളിലെ വികസന പ്രവർത്തനങ്ങൾ മുതൽ വലിയ റോഡ് പണികൾ വരെ ഇപ്പോൾ തടസ്സപ്പെട്ടിരിക്കുകയാണ്. എന്നിട്ടും യാഥാർത്ഥ്യം സമ്മതിക്കാതെ ജനങ്ങളെ വിഡ്ഢികളാക്കുന്ന പ്രസംഗങ്ങളാണ് നമ്മൾ കേട്ടുകൊണ്ടിരിക്കുന്നത്.
ചുരുക്കത്തിൽ പറഞ്ഞാൽ, കേരളത്തിന്റെ സാമ്പത്തിക അടിത്തറ തകർന്നു കഴിഞ്ഞു. അടിയന്തര ആവശ്യങ്ങൾക്ക് പോലും പണമില്ലാത്ത അവസ്ഥയിലേക്ക് സംസ്ഥാനം മാറിയിരിക്കുന്നു. ഇത്രയും വലിയ തുക കടമെടുത്തിട്ടും ശമ്പളവും പെൻഷനും കൊടുക്കാൻ സർക്കാർ പാടുപെടുകയാണ്. ഇതൊരു മുന്നറിയിപ്പാണ്. ഇനിയും ധൂർത്തും കെടുകാര്യസ്ഥതയും തുടർന്നാൽ ട്രഷറി പൂട്ടുക മാത്രമല്ല, സംസ്ഥാനം തന്നെ നിശ്ചലമാകുന്ന അവസ്ഥ വരും. ഈ സത്യങ്ങൾ ജനങ്ങൾ തിരിച്ചറിയേണ്ടതുണ്ട്. ആഡംബരത്തിനും പിആർ വർക്കിനും കൊടുക്കുന്ന പ്രാധാന്യം ജനങ്ങളുടെ പട്ടിണി മാറ്റാൻ സർക്കാർ കാണിക്കുന്നില്ല എന്നതാണ് കയ്പേറിയ സത്യം. ഇത് വെറും വാക്കുകളല്ല, നമ്മുടെ ട്രഷറികൾക്ക് മുന്നിൽ ക്യൂ നിൽക്കുന്ന പാവപ്പെട്ടവന്റെ സങ്കടമാണ്.
സത്യത്തിൽ നമ്മുടെ മുഖ്യമന്ത്രി പിണറായി വിജയൻ സാറിനെ സമ്മതിക്കണം, അദ്ദേഹത്തിന്റെ ആ ‘ഇരട്ടച്ചങ്ക്’ ഉണ്ടല്ലോ, അത് വെറുമൊരു വാക്കല്ല എന്ന് അദ്ദേഹം വീണ്ടും തെളിയിച്ചിരിക്കുകയാണ്. സാധാരണ ഏതൊരു ഭരണാധികാരിയും ഖജനാവ് കാലിയാകുമ്പോൾ ഒന്ന് പതറും, ജനങ്ങളോട് സത്യാവസ്ഥ പറയും. പക്ഷേ നമ്മുടെ ഇരട്ടച്ചങ്കൻ അങ്ങനെയല്ല. ഒരു വശത്ത് ട്രഷറിയിൽ 25 ലക്ഷം രൂപയുടെ ബില്ല് മാറാൻ പോലും വകയില്ലാതെ പൂട്ടുവീഴുമ്പോൾ, മറുവശത്ത് യാതൊരു കുലുക്കവുമില്ലാതെ വികസന നായകൻ ചമയാൻ ആ ചങ്കൂറ്റം തന്നെ വേണം. ലോകം മുഴുവൻ ചുറ്റി നടന്ന് വികസനം കൊണ്ടുവരാമെന്ന് പറയുന്ന ഇരട്ടച്ചങ്കൻ അറിയുന്നുണ്ടോ, ഇവിടെ സ്വന്തം നാട്ടിലെ കരാറുകാർ പണി ചെയ്ത കാശിനായി ട്രഷറിക്ക് മുന്നിൽ തപസ്സിരിക്കുന്നത്?
കടം വാങ്ങി നാട് മുടിക്കുമ്പോഴും ‘എല്ലാം ശരിയാകും’ എന്ന് പറയാൻ പ്രത്യേകമൊരു തൊലിക്കട്ടി തന്നെ വേണം. ഇരട്ടച്ചങ്കൻ എന്ന് നമ്മൾ വിളിക്കുന്നത് വെറുതെയല്ല, കാരണം ഒരു ചങ്ക് കടമെടുക്കാനും അടുത്ത ചങ്ക് ആ പൈസ എങ്ങനെ ധൂർത്തടിക്കണം എന്ന് ചിന്തിക്കാനുമാണ് അദ്ദേഹം ഉപയോഗിക്കുന്നത്. ഹെലികോപ്റ്ററിൽ പറക്കാനും വിദേശത്ത് പോയി പശുവിനെ കറക്കാൻ പഠിക്കാനും പണമില്ലെന്ന് പറഞ്ഞ് അദ്ദേഹം ഇതുവരെ മാറിനിന്നിട്ടില്ലല്ലോ. പക്ഷേ പാവം പെൻഷൻകാരും ജീവനക്കാരും പൈസ ചോദിക്കുമ്പോൾ മാത്രം ആ ഇരട്ടച്ചങ്കിനുള്ളിൽ നിന്ന് ‘കേന്ദ്രത്തിന്റെ അവഗണന’ എന്ന പഴയ കരച്ചിൽ പുറത്തുവരും.
മുണ്ടു മുറുക്കി ഉടുക്കാൻ ജനങ്ങളോട് ഉപദേശിക്കുന്ന മുഖ്യമന്ത്രി തന്റെ ആഡംബരങ്ങളുടെ കാര്യത്തിൽ ഒരു വിട്ടുവീഴ്ചയ്ക്കും തയ്യാറല്ല. ട്രഷറിയിൽ 25 ലക്ഷത്തിന് മുകളിലുള്ള ബില്ലുകൾക്ക് അനുമതി നിഷേധിക്കുമ്പോൾ, മുഖ്യമന്ത്രിയുടെ സുരക്ഷയ്ക്കും പബ്ലിസിറ്റിക്കും വേണ്ടി ഒഴുകുന്ന കോടികൾക്ക് ഒരു നിയന്ത്രണവുമില്ല. ഇതാണോ ആ ഇരട്ടച്ചങ്കന്റെ കരുത്ത്? സ്വന്തം ജനത സാമ്പത്തികമായി ശ്വാസം മുട്ടുമ്പോൾ അത് കണ്ടില്ലെന്ന് നടിക്കാൻ ഇത്രയും വലിയ ചങ്കൂറ്റം വേറെ ആർക്കുണ്ടാകും? കടം വാങ്ങി നെയ്യ് കുടിക്കുന്ന ഈ ‘ഇരട്ടച്ചങ്കൻ മോഡൽ’ വികസനം കൊണ്ട് അവസാനം കേരളം ഒരു വലിയ കടക്കെണിയായി മാറിയിരിക്കുകയാണ്. തിങ്കളാഴ്ച ഉച്ചയ്ക്ക് 12 മണിക്ക് ട്രഷറി പൂട്ടുന്നത് ഇരട്ടച്ചങ്കന്റെ ഭരണത്തിന്റെ കൂടി പൂട്ടാണോ എന്ന് ജനങ്ങൾ സംശയിച്ചാൽ അവരെ കുറ്റം പറയാൻ പറ്റില്ല. കാരണം, വീരവാദം കൊണ്ട് മാത്രം വയറു നിറയില്ലല്ലോ!
