അപകടത്തിൽ ബോളിവുഡ് നടൻ ഷാരൂഖ് ഖാന് പരിക്ക്.സിനിമ ചിത്രീകരണത്തിനിടെയാണ് നടൻ അപകടത്തിൽപ്പെട്ടത്.
സിദ്ധാർഥ് ആനന്ദ് ഒരുക്കുന്ന ‘കിംഗ്’ എന്ന സിനിമയുടെ ചിത്രീകരണത്തിനിടെയാണ് സംഭവം. മുംബൈയിലെ ഗോള്‍ഡന്‍ ടുബാക്കോ സ്റ്റുഡിയോയില്‍ സംഘട്ടനരംഗത്തിന്റെ ചിത്രീകരണത്തിനിടെയാണ് പരിക്കേറ്റതെന്നാണ് വിവരം. പുറത്തേറ്റ പരിക്കിനെത്തുടര്‍ന്ന് ചികിത്സയ്ക്കായി യുഎസിലേക്ക് പോയ താരം ഇവിടെനിന്ന് യുകെയിലേക്ക് മാറി. ഇപ്പോള്‍ കുടുംബത്തോടൊപ്പം യുകെയില്‍ വിശ്രമത്തിലാണ് ഷാരൂഖ്.
ഒരുമാസത്തെ വിശ്രമം നടന് നിര്‍ദേശിച്ചിട്ടുണ്ടെന്നാണ് വിവരം.അതേസമയം പരിക്ക് ഗുരുതരമല്ലെന്നും നിലവില്‍ അദ്ദേഹം സുഖം പ്രാപിച്ചുവരികയാണെന്നുമാണ് പുറത്തുവരുന്ന വിവരം. എന്നാൽ പരിക്കിനെ തുടർന്ന് നേരത്തെ, നിശ്ചയിച്ച ശ്രീലങ്കന്‍ യാത്ര താരം മാറ്റിവെച്ചു. കൂടാതെ ‘കിങി’ന്റെ ചിത്രീകരണവും താൽകാലികമായി നിര്‍ത്തിവെച്ചിട്ടുണ്ട്. സെപ്റ്റംബറില്‍ ഷൂട്ടിങ് പുനഃരാരംഭിക്കുമെന്നാണ് പ്രതീക്ഷിക്കുന്നത്.
