‘സിദ്ധിഖ്- ലാൽ സംവിധാനം ചെയ്ത മലയാളച്ചിത്രം ‘റാംജിറാവു സ്പീക്കിങ്ങി’ന്റെ ഹിന്ദി റീമേക്കായിരുന്നു 2000-ല്‍ പുറത്തിറങ്ങിയ ‘ഹേരാ ഫേരി’. സംവിധായകന്‍ പ്രിയദര്‍ശനായിരുന്നു ചിത്രം ബോളിവുഡില്‍ സംവിധാനം ചെയ്തത്. അക്ഷയ് കുമാര്‍, സുനില്‍ ഷെട്ടി, പരേഷ് റാവല്‍ എന്നിവര്‍ വേഷമിട്ട ചിത്രത്തിന്റെ രണ്ടാംഭാഗം 2006-ല്‍ പുറത്തിറങ്ങി. ചിത്രത്തിന്റെ മൂന്നാംഭാഗം പ്രിയദര്‍ശന്‍ പ്രഖ്യാപിച്ചിരുന്നു. എന്നാല്‍, മൂന്നാം ഭാഗത്തിൽ താന്‍ ഉണ്ടാവില്ലെന്ന വാര്‍ത്തകള്‍ പരേഷ് റാവല്‍ സ്ഥിരീകരിച്ചു.
കുറച്ച് ദിവസങ്ങള്‍ക്ക് മുമ്പ് ഒരു അഭിമുഖത്തിനിടയിൽ സുനില്‍ ഷെട്ടിയാണ്, ‘ഹേരാ ഫേരി 3’-ല്‍ പരേഷ് റാവല്‍ ഉണ്ടാവില്ലെന്ന സൂചന നല്‍കിയത്. സിനിമയുടെ അണിയറപ്രവര്‍ത്തകരുമായുള്ള കലാപരമായ ഭിന്നതകളെത്തുടര്‍ന്നാണ് പരേഷ് റാവല്‍ പിന്മാറുന്നതെന്നായിരുന്നു സുനില്‍ ഷെട്ടി പറഞ്ഞത്. മൂന്നാംഭാഗത്തില്‍ ഉണ്ടാവില്ലെന്ന സുനില്‍ ഷെട്ടിയുടെ വാക്കുകള്‍ ശരിവെച്ച പരേഷ് റാവല്‍ പക്ഷേ, ‘ഹേരാ ഫേരി 3’ ടീമുമായി അഭിപ്രായഭിന്നതകളുണ്ടെന്ന ആരോപണം നിഷേദ്ധിച്ചു.
”ഹേരാ ഫേരി 3′-ല്‍നിന്ന് വിട്ടുനില്‍ക്കാനുള്ള എന്റെ തീരുമാനം കലാപരമായ ഭിന്നതകളെത്തുടര്‍ന്നല്ലെന്ന് വ്യക്തമാക്കാന്‍ ഞാന്‍ ആഗ്രഹിക്കുകയാണ്. സംവിധായകനുമായി യാതൊരു സൃഷ്ടിപരമായ അഭിപ്രായവ്യത്യാസങ്ങളുമില്ലെന്ന് ഞാന്‍ ആവര്‍ത്തിക്കുന്നു. സംവിധായകനായ പ്രിയദര്‍ശനോട് എനിക്ക് അതിയായ സ്‌നേഹവും ബഹുമാനവും വിശ്വാസവുമുണ്ട്’, പരേഷ് റാവല്‍ കുറിച്ചു. അഭിഷേക് ബച്ചന്റേയും ജോണ്‍ അബ്രഹാമിന്റെയും കാര്‍ത്തിക് ആര്യന്റെയും പേരുകൾ ചിത്രവുമായി ബന്ധപ്പെടുത്തി ഉയർന്ന് കേൾക്കുന്നുണ്ട്.
