കേരളത്തെ പറ്റിക്കാൻ അടുത്ത തട്ടിപ്പ്

നമ്മൾ മലയാളികൾ എന്നും ഭാഗ്യവാന്മാരാണ്, പ്രത്യേകിച്ച് നമ്മുടെ ഖജനാവിന്റെ കാര്യത്തിൽ. ലോകം മുഴുവൻ സാമ്പത്തിക മാന്ദ്യത്തെക്കുറിച്ച് പേടിക്കുമ്പോൾ, ഇവിടെ നമ്മുടെ ധനമന്ത്രി കെ.എൻ. ബാലഗോപാൽ സാർ ചിരിച്ചുകൊണ്ട് പറയുന്നു—”പേടിക്കണ്ട, ഖജനാവ് സുഭദ്രമാണ്!” എന്ന്. പക്ഷേ ഈ ‘സുഭദ്രത’യുടെ പിന്നിലൊരു ചെറിയ മാജിക് ഉണ്ട്. സ്വന്തം പോക്കറ്റിൽ പണമില്ലാത്തപ്പോൾ അയൽക്കാരന്റെ സ്വർണ്ണം പണയം വെച്ച് പണം ഉണ്ടാക്കാൻ പോകുന്ന ഒരു തമാശയുണ്ടല്ലോ, ഏതാണ്ട് അതുപോലൊരു കഥയാണിത്. വാട്ടർ അതോറിറ്റിയെ സാക്ഷിയാക്കി നടത്തിയ ആ ‘4000 കോടി’ മാജിക്കിനെക്കുറിച്ചാണ് ഇന്ന് നമ്മൾ സംസാരിക്കുന്നത്.സംഭവം ഇതാണ്: കേരള വാട്ടർ അതോറിറ്റി നബാർഡിൽ (NABARD) നിന്ന് ഒരു 4000 കോടി രൂപ വായ്പ എടുത്തു. എന്തിനാണെന്നോ? ജൽജീവൻ മിഷൻ വഴി ഓരോ വീട്ടിലും വെള്ളമെത്തിക്കാൻ പൈപ്പിട്ട കരാറുകാർക്ക് പണം കൊടുക്കാൻ. പാവം കരാറുകാർ വീടും പുരയിടവും പണയം വെച്ചാണ് ഈ പണി ചെയ്തത്. അവർക്ക് പണം കൊടുക്കാൻ എടുത്ത ഈ 4000 കോടി നേരെ പോയത് എങ്ങോട്ടാണെന്നോ? സർക്കാരിന്റെ പൊതുഖജനാവിലേക്ക്! എന്നിട്ട് മന്ത്രി പറയുകയാണ്, “കണ്ടോ, എന്റെ ഖജനാവിൽ 4000 കോടിയുണ്ട്, ഞാൻ സുഭദ്രനാണ്” എന്ന്. മറ്റൊരാൾ സ്വന്തം മകളുടെ കല്യാണത്തിന് എടുത്ത ലോൺ അടിച്ചുമാറ്റിയിട്ട് “എന്റെ ബാങ്ക് ബാലൻസ് കണ്ടോ” എന്ന് ചോദിക്കുന്ന അതേ അവസ്ഥ!
ഈ പണത്തിന്റെ മറ്റൊരു തമാശ എന്താണെന്ന് വെച്ചാൽ, ഇത് വെറുതെ കിട്ടിയതല്ല. പലിശയ്ക്ക് എടുത്തതാണ്. ഏപ്രിൽ ഒന്ന് മുതൽ ഇതിന് പലിശ അടച്ചു തുടങ്ങണം. ഏകദേശം 92 കോടി രൂപ പലിശ ഇനത്തിൽ മാത്രം കൊടുക്കണം. വാട്ടർ അതോറിറ്റിക്ക് ജൽജീവൻ കണക്ഷനിൽ നിന്ന് കിട്ടുന്ന മാസവരുമാനം 8 കോടി രൂപയിൽ താഴെയാണ്. എട്ട് കോടി വരുമാനമുള്ള ആളിനെക്കൊണ്ട് 92 കോടി പലിശ അടിപ്പിക്കുന്ന ഈ ‘സാമ്പത്തിക ശാസ്ത്രം’ ഏത് സർവകലാശാലയിൽ പഠിപ്പിക്കുന്നതാണോ ആവോ? ഇതിനെയാണ് നമ്മൾ ‘കടം എടുത്ത് മുടിപ്പിക്കുക’ എന്ന് ലളിതമായി പറയുന്നത്.
ഇത് ഈ 4000 കോടിയുടെ മാത്രം കഥയല്ല. ഇതിനു മുൻപ് ഇതേപോലെ 5000 കോടി രൂപ വാട്ടർ അതോറിറ്റിയുടെ പേരിൽ വായ്പ എടുപ്പിച്ചിരുന്നു. അന്ന് ആ പണം കിട്ടിയപ്പോൾ സർക്കാർ എന്ത് ചെയ്തു? 3000 കോടി മാത്രം അതോറിറ്റിക്ക് നൽകി. ബാക്കി 2000 കോടി എവിടെ? അത് മ്യൂസിയത്തിൽ വെച്ചിരിക്കുകയാണോ അതോ ശമ്പളം കൊടുക്കാൻ വകമാറ്റിയോ എന്ന് ആർക്കും അറിയില്ല. ആകെ 6000 കോടി രൂപയാണ് വാട്ടർ അതോറിറ്റിയുടെ പേരിൽ ലോൺ എടുത്ത് സർക്കാർ ഇപ്പോൾ കൈക്കലാക്കി വെച്ചിരിക്കുന്നത്. എന്നിട്ടാണ് ടിവിയിൽ വന്ന് “കേന്ദ്ര വിഹിതം കിട്ടാത്തത് കൊണ്ടാണ് പ്രതിസന്ധി” എന്ന സ്ഥിരം പല്ലവി പാടുന്നത്. സ്വന്തം കയ്യിലുള്ള വായ്പാ തുക വിതരണം ചെയ്യാത്തതിനെക്കുറിച്ച് മാത്രം ഒരക്ഷരം മിണ്ടില്ല.
വാട്ടർ അതോറിറ്റി എം.ഡി സർക്കാരിന് ഒരു കത്തെഴുതിയിരുന്നു. “സാറേ, കരാറുകാർക്ക് 7051 കോടി കുടിശ്ശികയുണ്ട്, പൈപ്പിടാൻ വെട്ടിപ്പൊളിച്ച റോഡ് നന്നാക്കാൻ 1850 കോടി ഉടനെ വേണം” എന്ന്. ഇതിന്റെ അടിസ്ഥാനത്തിലാണ് പുതിയ ലോൺ എടുത്തത്. പക്ഷേ ഈ ലോൺ തുക മുഴുവൻ പദ്ധതിക്ക് വേണ്ടി ചെലവാക്കുമോ എന്നതിൽ ഒരു ഉറപ്പുമില്ല. പൈപ്പിടാൻ റോഡ് വെട്ടിപ്പൊളിച്ചിട്ട് അത് നന്നാക്കാത്തത് കൊണ്ട് ജനം തെറി വിളിക്കുന്നത് വാട്ടർ അതോറിറ്റിക്കാരെയാണ്. പണം വാങ്ങി ഖജനാവിൽ പൂട്ടി വെച്ച് ലാഭം കൊയ്യുന്നത് ധനമന്ത്രിയും
കേരളം കടം കൊണ്ട് മുടിഞ്ഞു എന്ന് പറയുന്നത് വെറുതെയല്ല. കടം വാങ്ങി പലിശ അടയ്ക്കാനും വീണ്ടും കടം വാങ്ങുന്ന ഈ രീതി അപകടകരമാണ്. വാട്ടർ അതോറിറ്റിയെ പാപ്പരാക്കി ഖജനാവ് സുരക്ഷിതമാണെന്ന് കാണിക്കുന്ന ഈ കളി ഒരു ദിവസം പൊളിയും. അന്ന് പുതിയ സർക്കാരോ അല്ലെങ്കിൽ വരാനിരിക്കുന്ന തലമുറയോ ഈ പലിശയുടെ ഭാരം ചുമക്കേണ്ടി വരും. ബാലഗോപാൽ സാറിന്റെ ഈ ‘ഖജനാവ് സുഭദ്രം’ എന്ന തള്ള് കേൾക്കുമ്പോൾ, പൈപ്പിട്ട കാശിന് വേണ്ടി സെക്രട്ടേറിയറ്റിന് മുന്നിൽ നിൽക്കുന്ന കരാറുകാരെ ഒന്ന് ഓർക്കുന്നത് നന്നായിരിക്കും.നമ്മുടെ ധനമന്ത്രിയുടെ വലിയൊരു മാജിക് ആണിത്. വാട്ടർ അതോറിറ്റിക്ക് മാസം കിട്ടുന്ന വരുമാനം വെറും 8 കോടി രൂപ. പക്ഷേ പലിശ അടയ്ക്കേണ്ടത് 92 കോടി! ഇത് കേൾക്കുമ്പോൾ തന്നെ ആർക്കും മനസ്സിലാകും, ആ 8 കോടി കൊണ്ട് പലിശയുടെ പത്തിലൊന്ന് പോലും അടയ്ക്കാൻ പറ്റില്ലെന്ന്. അപ്പോൾ ബാക്കി പണം എവിടെ നിന്ന് വരും? അത് അടയ്ക്കാൻ സർക്കാർ വീണ്ടും എവിടെ നിന്നെങ്കിലും കടമെടുക്കും. അതായത്, “കടം വാങ്ങിയ പണത്തിന്റെ പലിശ അടയ്ക്കാൻ വേറെ കടം വാങ്ങുന്ന” ഒരു അപൂർവ്വ സാമ്പത്തിക ശാസ്ത്രമാണ് ഇവിടെ നടക്കുന്നത്. ഇതിനെയാണ് നമ്മൾ ‘കടക്കെണി’ എന്ന് വിളിക്കുന്നത്