സിപിഎം ഭരണസമിതി നൂറുകോടിയോളം രൂപയുടെ സാമ്പത്തിക ക്രമക്കേട് നടത്തിയെന്നാരോപണവുമായി ബന്ധപ്പെട്ട് നേമം സർവീസ് സഹകരണ ബാങ്കിൽ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) റെയ്ഡ് നടത്തി. കൊച്ചിയിൽ നിന്നെത്തിയ ഇ.ഡി സംഘം വെള്ളിയാഴ്ച ബാങ്ക് ആസ്ഥാനത്ത് പരിശോധന ആരംഭിച്ചു.
തദ്ദേശ തിരഞ്ഞെടുപ്പ് അടുത്തിരിക്കെ സിപിഎമ്മിന് രാഷ്ട്രീയമായി വലിയ ആഘാതമാകുന്ന രീതിയിലാണ് റെയ്ഡ് നടന്നത്. പ്രദേശത്ത് നിക്ഷേപകരുടെ കൂട്ടായ്മ നാളുകളായി വ്യാപകമായ പ്രതിഷേധം നടത്തി വരികയായിരുന്നു.
ക്രമക്കേടുമായി ബന്ധപ്പെട്ട് സിപിഎം ഏരിയ കമ്മിറ്റി അംഗമായിരുന്ന ആർ. പ്രദീപ് കുമാർ അടക്കമുള്ളവർ മുമ്പ് അറസ്റ്റിലായിരുന്നു.
സർക്കാർ നിയോഗിച്ച അന്വേഷണ സമിതിയുടെ റിപ്പോർട്ടനുസരിച്ച്, ബാങ്ക് 34.26 കോടി രൂപയുടെ ലോൺ അനുവദിച്ചതിൽ നിന്ന് 15.55 കോടി രൂപയ്ക്കുള്ള രേഖകൾ മാത്രമാണ് ലഭ്യമായത്. അതുപോലെ, പ്രതിമാസ നിക്ഷേപ പദ്ധതിയിലൂടെ 10.73 കോടി രൂപ കിട്ടാനുള്ളതിൽ, 4.83 കോടി രൂപയ്ക്കുള്ള രേഖകൾ മാത്രമാണ് നിലനിൽക്കുന്നത്.
മുൻ സെക്രട്ടറിമാരായ എസ്. ബാലചന്ദ്രൻ നായർ (₹20.76 കോടി), എ. ആർ. രാജേന്ദ്രകുമാർ (₹31.63 കോടി), എസ്. എസ്. സന്ധ്യ (₹10.41 കോടി) എന്നിവർ ക്രമക്കേടിൽ പങ്കാളികളായതായി കണ്ടെത്തൽ സൂചിപ്പിക്കുന്നു.
കഴിഞ്ഞ പത്ത് വർഷത്തിനിടെ ബാങ്ക് ഭരണസമിതി അംഗങ്ങൾ ഓരോരുത്തരും കോടികൾ നഷ്ടപ്പെടുത്തി എന്നതും റിപ്പോർട്ടിൽ പറയുന്നു. അമിതമായ നിക്ഷേപം നേടാനായി സ്ഥിര നിക്ഷേപങ്ങൾക്ക് അധിക പലിശ വാഗ്ദാനം ചെയ്യുകയും, രേഖകളില്ലാതെ വായ്പ അനുവദിക്കുകയും ചെയ്തതാണ് ബാങ്കിന് വൻ ബാധ്യതയുണ്ടാക്കിയത്.
