സംസ്ഥാനത്ത് കൃത്രിമ വൈദ്യുതി ക്ഷാമം സൃഷ്ടിച്ചുവെന്നും ജി.എൻ.എ കരാർ നീക്കത്തിൽ ജുഡീഷ്യൽ അന്വേഷണം വേണമെന്നും ആവശ്യപ്പെട്ട് പ്രതിപക്ഷ നേതാവ് പിണറായി വിജയൻ. കരാറിലൂടെ കെ.എസ്.ഇ.ബിക്ക് കോടികളുടെ നഷ്ടമുണ്ടാകുമായിരുന്നെന്നും വിചിത്രമായ നടപടികളാണ് നിലവിലെ യു.ഡി.എഫ് സർക്കാരിന്റെ ഭാഗത്തുനിന്നു ഉണ്ടാകുന്നതെന്നും അദ്ദേഹം ആരോപിച്ചു.
സംസ്ഥാനത്ത് മന്ത്രിസഭയുടെ കൂട്ടുത്തരവാദിത്തം പൂർണ്ണമായും നഷ്ടപ്പെട്ടതായി പ്രതിപക്ഷ നേതാവ് കുറ്റപ്പെടുത്തി. ഭരണം ഒരാളിലേക്ക് മാത്രം കേന്ദ്രീകരിക്കുന്നത് ശരിയായ രീതിയല്ല. കെ.എസ്.ഇ.ബി സി.എം.ഡിയെ മാറ്റിയതും പുതിയ ആളെ നിയമിച്ചതുമൊന്നും ബന്ധപ്പെട്ട വകുപ്പ് മന്ത്രി അറിയുന്നില്ല. സി.എം.ഡി നേരിട്ട് മുഖ്യമന്ത്രിയുമായി മാത്രം കാര്യങ്ങൾ സംസാരിക്കുകയാണ്. എന്തിനാണ് ഇങ്ങനെയൊരു മന്ത്രിസ്ഥാനമെന്നും കേരളത്തിൽ ഇതുവരെയില്ലാത്ത ഭരണരീതിയാണ് നടക്കുന്നതെന്നും മറ്റു മന്ത്രിമാർക്കും സമാന അനുഭവമാണുള്ളതെന്നും അദ്ദേഹം പറഞ്ഞു.
