വൈറ്റമിൻ പി ലഭിക്കാൻ ഡയറ്റിൽ ഈ ഭക്ഷണങ്ങൾ ഉൾപ്പെടുത്താം പച്ചക്കറികൾ, കടുത്ത നിറമുള്ള പഴങ്ങൾ, കൊക്കോ എന്നിവയിൽ കാണപ്പെടുന്ന മഞ്ഞ പോളിഫിനോളിക് സംയുക്തങ്ങളുടെ കൂട്ടം ആണ് വൈറ്റമിൻ പി. മിക്ക ചെടികൾക്കും തെളിച്ചമുള്ള നിറങ്ങൾ നൽകുന്നത് ക്യുവർസെറ്റിൻ, റുട്ടിൻ, ഹെസ്പെറിഡിൻ, കറ്റേച്ചിനുകൾ തുടങ്ങിയ ബയോഫ്ലേവനോയ്ഡുകൾ ആണ് . ഇവയ്ക്ക് ആന്റി ഓക്സിഡന്റ്, ആന്റി ഇൻഫ്ലമേറ്ററി ഗുണങ്ങൾ ഉണ്ട്. ഇവ ഹൃദയാരോഗ്യം മെച്ചപ്പെടുത്താനും സഹായിക്കും. ബയോഫ്ലേവനോയ്ഡുകൾ മനുഷ്യശരീരത്തിന് ഉൽപാദിപ്പിക്കാനാവില്ല. ഇവ പ്രതിരോധശക്തി കൂട്ടുവാനും വിറ്റമിന്‍ സിയുടെ പ്രവർത്തനങ്ങൾ മെച്ചപ്പെടുത്താനും ഗുരുതര രോഗങ്ങൾ തടയാനും സഹായിക്കുന്നു.
70 ശതമാനമെങ്കിലും കൊക്കോ അടങ്ങിയതും കറ്റേച്ചിനുകൾ പോലുള്ള ഫ്ലേവനോയ്ഡുകൾ ധാരാളം അടങ്ങിയതുമായ ഡാർക്ക് ചോക്ലേറ്റ് കഴിക്കാം. ഇവയില്‍ ആന്റി ഓക്സിഡന്റുകളും ധാരാളമുണ്ട്.
ബയോഫ്ലേവനോയ്ഡായ ക്യുവർസെറ്റിൻ തൊലികളയാത്ത ആപ്പിളിൽ ധാരാളമുണ്ട്. ആപ്പിൾ ലഘുഭക്ഷണമായും സാലഡിനൊപ്പവും നട്ട് ബട്ടർ ചേർത്തും കഴിക്കാം. ആപ്പിൾ തൊലിയിൽ ഫ്ലേവനോയ്ഡുകൾ ധാരാളമുണ്ട്. അതിനാൽ വൈറ്റമിൻ പി ലഭിക്കാൻ തൊലി കളയാത ആപ്പിൾ കഴിക്കാം.
ഫ്ലേവനോയ്ഡുകളായ കറ്റേച്ചിനുകള്‍ ഗ്രീൻ ടീയിലും കട്ടൻചായയിലും ധാരാളമുണ്ട്. ദിവസവും രണ്ടോ മൂന്നോ കപ്പ് ചായ (ചൂടുള്ളതോ ഐസ്ഡ് ടീയോ) കുടിക്കുന്നത് ശരീരത്തിനാവശ്യമായ ബയോഫ്ലേവനോയ്ഡുകൾ ലഭിക്കാൻ സഹായിക്കും. മധുരം അധികം ചേർക്കാതെ കഴിക്കച്ച് ഗുണങ്ങൾ കൂട്ടാം . ചായ കുടിക്കുന്നതിലൂടെ വൈറ്റമിൻ പി നമ്മുടെ ശരീരത്തിന് ലഭിക്കും.
ബയോഫ്ലേവനോയ്ഡുകളായ ആന്തോസയാനിനുകളും ക്യുവർ സെറ്റിനും ബ്ലൂബെറി, സ്ട്രോബെറി, റാസ്പ്ബെറി, ബ്ലാക്ക് ബെറി മുതലായ ബെറിപ്പഴങ്ങളിൽ ധാരാളമുണ്ട്. ബ്രേക്ക് ഫാസ്റ്റ് സെറീയലിനൊപ്പം ഒരുപിടി ബെറിപ്പഴങ്ങൾ ചേർത്തും, സ്മൂത്തികളിൽ ചേർത്തും ലഘുഭക്ഷണമായും കഴിക്കാം. പതിവായി ബെറിപ്പഴങ്ങൾ കഴിക്കുന്നതിലൂടെ വൈറ്റമിൻ പി ലഭിക്കാൻ സഹായിക്കുന്നതോടൊപ്പം ആന്റി ഓക്സിഡന്റുകളും ലഭിക്കുന്നു.
ഓറഞ്ച്, നാരങ്ങ, ഗ്രേപ്പ് ഫ്രൂട്ട് തുടങ്ങിയ നാരകഫലങ്ങളിൽ ബയോഫ്ലേവനോയ്ഡുകൾ ധാരാളമായി ഉണ്ട്. പ്രത്യേകിച്ചും റുട്ടിൻ, ഹെസ്പ്പെറിഡിൻ ഇവയുണ്ട്. പഴങ്ങൾ തനിയെയോ സാലഡുകളിൽ ചേർത്തോ, ജ്യൂസ് ആക്കിയോ ഉപയോഗിക്കാം. നാരകഫലങ്ങളെ പൊതിഞ്ഞിരിക്കുന്ന വെളുത്ത തൊലിയിൽ ബയോഫ്ലേവനോയ്ഡുകൾ ഉണ്ട്. അതുകൊണ്ടു തന്നെ ഇവ കളയാതെ കഴിക്കാൻ ശ്രദ്ധിക്കാം.
