ഓറിക മുംബൈ സ്കൈ സിറ്റി ; ഇന്ത്യയിൽ ഏറ്റവുമധികം മുറികളുള്ള ഹോട്ടൽ

പ്രമുഖ ഹോട്ടൽ ബ്രാൻഡാണ് ടാറ്റയുടെ താജ്. എന്നാൽ മുംബൈയിലെ ഈ അത്യാഡംബര ഹോട്ടലിൽ ഉള്ളതിനേക്കാൾ കൂടുതൽ മുറികളുള്ള മറ്റൊരു ഹോട്ടൽ ബ്രാൻഡുണ്ട്. ലെമൺ ട്രീ ഹോട്ടൽസിന്റെ ഓറിക മുംബൈ സ്കൈ സിറ്റി എന്ന ഹോട്ടലാണത്

ഇന്ത്യയിലെ പ്രശസ്തമായ ഹോട്ടൽ ശൃംഘലയാണ് താജ് ഗ്രൂപ്പ് ഓഫ് ഹോട്ടൽസ്. ടാറ്റ ഗ്രൂപ്പിന്റെ ഭാഗമായ ബ്രാൻഡാണിത്. ലോകോത്തര നിലവാരമുള്ള സൗകര്യങ്ങളാണ് ഇവിടെ ലഭ്യമായിരിക്കുന്നത്. മുംബൈ ഗേറ്റ് വേയ്ക്ക് സമീപമുള്ള താജ് ഹോട്ടലിൽ നിരവധി മുറികളാണുള്ളത്. എന്നാൽ ഇന്ത്യയിൽ ഏറ്റവുമധികം റൂമുകളള്ള ഹോട്ടൽ ഇതല്ല എന്നതാണ് യാഥാർത്ഥ്യം. മുറികളുടെ എണ്ണത്തിന്റെ കാര്യത്തിൽ താജിനെ കടത്തി വെട്ടിയ ഹോട്ടൽ മുംബൈയിൽ തന്നെയാണുള്ളത്. ഓറിക മുംബൈ സ്കൈ സിറ്റിയാണ് (Aurika Mumbai Skycity) ഇന്ത്യയിൽ ഏറ്റവുമധികം മുറികളുള്ള ഹോട്ടൽ.

ഇവിടെ 669 റൂമുകളാണുള്ളത്. അതേ സമയം മുംബൈ താജ് ഹോട്ടലിൽ 600 മുറികളാണുള്ളത്. മുംബൈ ഛത്രപതി ശിവജി മഹാരാജ് ഇന്റർനാഷണൽ എയർപോർട്ട്, ടെർമിനൽ-2ന്റെ സമീപമാണ് ഈ ഹോട്ടൽ സ്ഥിതി ചെയ്യുന്നത്. ഇന്റർനാഷണൽ ട്രാവലേഴ്സ് അടക്കമുള്ള ടൂറിസ്റ്റുകൾക്ക് എളുപ്പം എത്തിപ്പെടാവുന്നത്ര അകലത്തിലാണ് ഈ ഹോട്ടലുള്ളത്.

മുംബൈ സ്കൈ സിറ്റി ഹോട്ടലിൽ ലോകോത്തര നിലവാരമുള്ള സൗകര്യങ്ങളാണ് ഒരുക്കിയിരിക്കുന്നത്. വിവിധ റസ്റ്ററന്റുകൾ, സ്മാപ, സ്വിമ്മിങ് പൂൾ, സലൂൺ, ഫിറ്റ്നസ് സെന്റർ തുടങ്ങിയവയെല്ലാം ഇവിടെ സജ്ജമാക്കിയിരിക്കുന്നു. പ്രമുഖ അമേരിക്കൻ ഓൺലൈൻ ട്രാവൽ ഏജൻസിയായ ട്രിപ് അഡ്വൈസർ, ഈ ഹോട്ടലിന് 5 സ്റ്റാർ റേറ്റിങ്ങാണ് നൽകിയിരിക്കുന്നത്. അതിഥികൾക്ക് വ്യത്യസ്ത തരത്തിലുള്ള റൂമുകൾ സ്കൈ സിറ്റിയിൽ ഒരുക്കിയിരിക്കുന്നു. ഇവിടെ ഒരു രാത്രിക്ക് 7,920 രൂപ മുതൽ 20,790 രൂപ വരെ നിരക്കുകളുള്ള മുറികൾ ലഭ്യമാണ്. വിവിധ മുറികളിൽ നിരക്കുകൾക്ക് അനുസരിച്ച് ലഭ്യമായ സൗകര്യങ്ങളിൽ വ്യത്യാസമുണ്ട്.

ലെമൺ ട്രീ ഹോട്ടൽസ് ലോഞ്ച് ചെയ്ത ഹോട്ടൽ ബ്രാൻഡാണ് സ്കൈ സിറ്റി. ഓറിക ഹോട്ടൽസ് & റസ്റ്ററന്റ്സ് എന്ന ബ്രാൻഡിന് കീഴിൽ മുംബൈയിൽ ലോഞ്ച് ചെയ്യുന്ന മൂന്നാമത്തെ ഹോട്ടലാണിത്. ബിസിനസ്, ലെഷർ ടൂറിസ്റ്റുകളിൽ നിന്ന് വർധിച്ച ഡിമാൻഡാണ് ഉണ്ടാകുന്നതെന്ന്, 2023ൽ ഈ ഹോട്ടലിന്റെ ലോഞ്ചിങ് വേളയിൽ ലെമൺ ട്രീ ഹോട്ടൽസ് ചെയർമാൻ & മാനേജിങ് ഡയറക്ടർ പതഞ്ജലി. ജെ കേസ്വാനി പറഞ്ഞിരുന്നു. ഇന്ത്യയിൽ, മുംബൈ, ചെന്നൈ, ‍ഡൽഹി, ഹൈദരാബാദ്, കൊൽക്കത്ത അടക്കമുള്ള വൻ നഗരങ്ങളിൽ ആഡംബര ഹോട്ടലുകളിൽ വലിയ ഡിമാൻഡാണ് റൂമുകൾക്കുണ്ടാകുന്നത്. ടൂറിസം സീസണുകളിൽ പലയിടത്തും മുറികൾ ലഭ്യമാകാത്ത സ്ഥിതി വിശേഷം പോലുമുണ്ട്.