കേരള കോൺഗ്രസിനുള്ളിൽ മുഖ്യമന്ത്രി സ്ഥാനത്തെച്ചൊല്ലിയുള്ള തർക്കം പുതിയ തലത്തിലേക്ക്. പ്രതിപക്ഷ നേതാവ് വി.ഡി. സതീശനെതിരെ രൂക്ഷമായ വിമർശനങ്ങളുമായി എറണാകുളം ഡിസിസി ഓഫീസിന് മുന്നിൽ ഫ്ലക്സ് ബോർഡുകളും പോസ്റ്ററുകളും പ്രത്യക്ഷപ്പെട്ടു. ‘വി.ഡി. സതീശന്റെ പിആർ പണി അവസാനിപ്പിക്കുക’ എന്ന ആഹ്വാനവുമായാണ് ഒരു വിഭാഗം രംഗത്തെത്തിയിരിക്കുന്നത്.
പിആർ വർക്കിന്റെ ബലത്തിൽ രമേശ് ചെന്നിത്തലയെപ്പോലുള്ള മുതിർന്ന നേതാക്കളെ താറടിച്ച് കേരളത്തിന്റെ മുഖ്യമന്ത്രിയാകാനുള്ള വി.ഡി. സതീശന്റെ വ്യാമോഹം വിലപ്പോകില്ലെന്നാണ് ബോർഡിലെ എഴുത്ത്.
മുഖ്യമന്ത്രിയെ ഹൈക്കമാൻഡ് തീരുമാനിക്കട്ടെ: കോൺഗ്രസിന്റെ മുഖ്യമന്ത്രിയെ ഹൈക്കമാൻഡ് തീരുമാനിച്ചുകൊള്ളുമെന്നും, സതീശൻ സ്വന്തം നിലയിലുള്ള പ്രചാരണങ്ങൾ നിർത്തണമെന്നും ഫ്ലക്സിൽ ആവശ്യപ്പെടുന്നു.
‘ഇന്ത്യൻ നാഷണൽ കോൺഗ്രസ് ഫാമിലി’ എന്ന പേരിലാണ് ഈ ബോർഡുകൾ സ്ഥാപിച്ചിരിക്കുന്നത്. എറണാകുളം ഡിസിസി ഓഫീസിന് മുന്നിലും കളമശ്ശേരിയിലെ വിവിധ ഭാഗങ്ങളിലും സമാനമായ പോസ്റ്ററുകൾ പ്രത്യക്ഷപ്പെട്ടിട്ടുണ്ട്. ഇതിനിടെ ഡിസിസി ഓഫീസിന് മുന്നിൽ സ്ഥാപിച്ച ഒരു ഫ്ലക്സ് ബോർഡ് കോൺഗ്രസ് പ്രവർത്തകർ തന്നെ വലിച്ചുകീറി മാറ്റി.
കഴിഞ്ഞ കുറച്ചു ദിവസങ്ങളായി വി.ഡി. സതീശനെ അനുകൂലിക്കുന്നവരും രമേശ് ചെന്നിത്തലയെ അനുകൂലിക്കുന്നവരും തമ്മിൽ സോഷ്യൽ മീഡിയയിൽ വലിയ തർക്കങ്ങൾ നടക്കുന്നുണ്ട്. കഴിഞ്ഞ ദിവസം എറണാകുളത്തെ ഒരു പരിപാടിയിൽ വെച്ച്, താൻ രാഷ്ട്രീയത്തിൽ പെട്ടെന്ന് പൊട്ടിവീണ ആളല്ലെന്നും സൈക്കിളിൽ പോയി രാഷ്ട്രീയ പ്രവർത്തനം നടത്തിയ പരിചയമുണ്ടെന്നും ചെന്നിത്തല പറഞ്ഞിരുന്നു. ഇത് സതീശനെ ലക്ഷ്യം വെച്ചാണെന്നാണ് വിലയിരുത്തപ്പെടുന്നത്.പരസ്യ പ്രതികരണങ്ങൾ പാടില്ലെന്ന് കെപിസിസി അധ്യക്ഷൻ കെ. സുധാകരൻ കർശന നിർദ്ദേശം നൽകിയിട്ടും അത് ലംഘിക്കപ്പെടുന്ന സാഹചര്യമാണ് നിലവിലുള്ളത്. ഡിസിസി ഓഫീസിന് മുന്നിലെ സിസിടിവി ദൃശ്യങ്ങൾ പരിശോധിച്ചാൽ ഫ്ലക്സ് വെച്ചവരെ കണ്ടെത്താമെങ്കിലും നേതൃത്വം ഇതുവരെ കർശന നടപടിയിലേക്ക് കടന്നിട്ടില്ല
വി.ഡി. സതീശനെതിരെ എറണാകുളം ഡിസിസി ഓഫീസിന് മുന്നിൽ ഫ്ലക്സ്; കോൺഗ്രസിൽ പോര് തെരുവിലേക്ക്
