കേരളത്തിന്റെ മണ്ണിൽ താമര വിരിയില്ല, ഇവിടെ ബിജെപിക്ക് ഒരുകാലത്തും അക്കൗണ്ട് തുറക്കാൻ കഴിയില്ല, ബിജെപിയുടെ വളർച്ച കേരളത്തിൽ അവസാനിച്ചു, ആ അക്കൗണ്ട് തങ്ങൾ എന്നെന്നേക്കുമായി പൂട്ടി പൂവിലിട്ടു” എന്നിങ്ങനെ പതിറ്റാണ്ടുകളായി കേരളത്തിന്റെ രാഷ്ട്രീയ മണ്ഡലത്തിൽ നമ്മൾ സ്ഥിരമായി കേട്ടുകൊണ്ടിരുന്ന, പലരും അഹങ്കാരത്തോടെ ആവർത്തിച്ച് പ്രവചിച്ച പരിഹാസങ്ങൾക്കും വലിയ രാഷ്ട്രീയ പ്രതിരോധങ്ങൾക്കും ഒടുവിലാണ് ഇപ്പോൾ ചരിത്രം തിരുത്തപ്പെട്ടിരിക്കുന്നത്. ഇത് കേവലം മൂന്ന് സീറ്റുകളിലെ വിജയം മാത്രമല്ല, വർഷങ്ങളായി ബിജെപിയെയും അതിന്റെ അണികളെയും സോഷ്യൽ മീഡിയയിലും രാഷ്ട്രീയ വേദികളിലും ക്രൂരമായി വിമർശിച്ചവർക്കും പരിഹസിച്ചവർക്കും ജനങ്ങൾ വോട്ടിലൂടെ നൽകിയ ഏറ്റവും ശക്തമായ മറുപടിയാണ്. ഒന്നല്ല, രണ്ടല്ല, മൂന്ന് നിയമസഭാ സീറ്റുകളുമായി ഭാരതീയ ജനതാ പാർട്ടി കേരള നിയമസഭയുടെ പടവുകൾ ഔദ്യോഗികമായി ചവിട്ടിക്കയറുമ്പോൾ അത് ആ പഴയ വിമർശകരുടെ മുൻവിധികളെ മുഴുവൻ തച്ചുടച്ചുകൊണ്ടുള്ള പ്രഖ്യാപനമായി മാറുകയാണ്. അക്കൗണ്ട് തുറക്കില്ലെന്ന് വെല്ലുവിളിച്ചവർക്ക് മുന്നിൽ മൂന്ന് സീറ്റുകൾ നേടി കരുത്ത് തെളിയിച്ച ബിജെപിയുടെ ഈ ചരിത്ര വിജയത്തിന് പിന്നിലെ യഥാർത്ഥ കാരണങ്ങൾ എന്തൊക്കെയാണ്? 1980-ൽ പാർട്ടി രൂപീകൃതമായത് മുതൽ വിമർശനങ്ങളെയും പ്രതിസന്ധികളെയും അതിജീവിച്ച് ഇന്നത്തെ ഈ വമ്പൻ കുതിപ്പ് വരെയുള്ള കേരളത്തിലെ ബിജെപിയുടെ രാഷ്ട്രീയ ചരിത്രവും വോട്ട് വിഹിതത്തിന്റെ വളർച്ചയും വന്ന മാറ്റങ്ങളും നമുക്കിന്ന് വിശദമായി പരിശോധിക്കാം.
ഭാരതീയ ജനതാ പാർട്ടി 1980-ൽ രൂപീകരിക്കപ്പെട്ടത് മുതൽ കേരളത്തിൽ തിരഞ്ഞെടുപ്പുകളിൽ സജീവമായി മത്സരിക്കുന്നുണ്ടെങ്കിലും ആദ്യകാലങ്ങളിൽ വലിയ ചലനങ്ങൾ ഉണ്ടാക്കാൻ പാർട്ടിക്ക് കഴിഞ്ഞിരുന്നില്ല. കേരളത്തിൽ എൽഡിഎഫും യുഡിഎഫും മാറിമാറി ഭരിക്കുന്ന ശക്തമായ ഇരുമുന്നണി രാഷ്ട്രീയ സംവിധാനത്തെ ഭേദിക്കുക എന്നത് ബിജെപിയെ സംബന്ധിച്ച് വലിയൊരു വെല്ലുവിളിയായിരുന്നു. വോട്ട് ശതമാനത്തിൽ നേരിയ വർദ്ധനവ് പല മണ്ഡലങ്ങളിലും പ്രകടമായിരുന്നെങ്കിലും സീറ്റുകളിലേക്ക് എത്തില്ലെന്നും ബിജെപിക്ക് വോട്ട് ചെയ്യുന്നത് വോട്ട് കളയുന്നതിന് തുല്യമാണെന്നും പറഞ്ഞ് പലരും അന്ന് പാർട്ടിയെയും അണികളെയും നിരന്തരം നിരാശപ്പെടുത്താനും വിമർശിക്കാനും ശ്രമിച്ചിരുന്നു. എന്നാൽ 2014-ഓടെ, അതായത് കേന്ദ്രത്തിൽ നരേന്ദ്ര മോദി സർക്കാർ അധികാരത്തിൽ വന്നതിന് ശേഷം കേരളത്തിലും ബിജെപിയുടെ അടിത്തറയിൽ വലിയ മാറ്റങ്ങൾ പ്രകടമായിത്തുടങ്ങി. ആ വർഷത്തെ ലോക്സഭാ തിരഞ്ഞെടുപ്പിലാണ് പാർട്ടിയുടെ വോട്ട് വിഹിതം കേരളത്തിൽ ആദ്യമായി പത്ത് ശതമാനം കടന്ന് ചരിത്രം കുറിക്കുന്നത്. തിരുവനന്തപുരം പോലുള്ള മണ്ഡലങ്ങളിൽ ഒ. രാജഗോപാൽ നേരിയ വ്യത്യാസത്തിൽ രണ്ടാം സ്ഥാനത്തെത്തിയതും വിമർശകരുടെ നെഞ്ചിടിപ്പ് കൂട്ടിത്തുടങ്ങിയ നിമിഷമായിരുന്നു.
ഈ വളർച്ചയുടെ സ്വാഭാവിക തുടർച്ചയായിരുന്നു 2016-ലെ നിയമസഭാ തിരഞ്ഞെടുപ്പിൽ കേരളം കണ്ടത്. തിരുവനന്തപുരത്തെ നേമം മണ്ഡലത്തിലൂടെ ഒ. രാജഗോപാൽ വിജയിച്ചപ്പോൾ കേരള നിയമസഭയിൽ ബിജെപി തങ്ങളുടെ ചരിത്രത്തിലെ ആദ്യ അക്കൗണ്ട് തുറന്നു. അന്ന് സംസ്ഥാനത്താകെ 11.3 ശതമാനം വോട്ട് വിഹിതമാണ് പാർട്ടി സ്വന്തമാക്കിയത്. എന്നാൽ 2021-ലെ തിരഞ്ഞെടുപ്പിൽ ശക്തമായ ഒത്തുകളി രാഷ്ട്രീയത്തിനും ത്രികോണ മത്സരത്തിനുമൊടുവിൽ നേമം സീറ്റ് തിരിച്ചുപിടിച്ച് ബിജെപിയെ വീണ്ടും പൂജ്യത്തിൽ എത്തിക്കാൻ കഴിഞ്ഞപ്പോൾ രാഷ്ട്രീയ എതിരാളികൾ വലിയ രീതിയിൽ ആഹ്ലാദിക്കുകയും ബിജെപിയുടെ അക്കൗണ്ട് തങ്ങൾ എന്നെന്നേക്കുമായി പൂട്ടി എന്ന് വീരവാദം മുഴക്കുകയും ചെയ്തു. ബിജെപിയുടെ കഥ കഴിഞ്ഞു എന്ന് വിധിയെഴുതിയ ആ വിമർശകർക്ക് നേരെയാണ് ഭാരതീയ ജനതാ പാർട്ടി പിന്നീട് ശക്തമായി തിരിച്ചടിച്ചത്. ഈ തിരിച്ചടികളിലും തളരാതെ താഴെത്തട്ടിൽ പ്രവർത്തനം ശക്തമാക്കിയ ബിജെപിക്ക് 2024-ലെ ലോക്സഭാ തിരഞ്ഞെടുപ്പിൽ വൻ കുതിച്ചുചാട്ടം നടത്താൻ സാധിച്ചു. തൃശ്ശൂർ മണ്ഡലത്തിൽ നിന്ന് സുരേഷ് ഗോപി വൻ ഭൂരിപക്ഷത്തോടെ വിജയിച്ച് കേരളത്തിൽ നിന്നുള്ള ആദ്യ ബിജെപി ലോക്സഭാംഗമായി മാറിയപ്പോൾ, ബിജെപിക്ക് ഇവിടെ വോട്ട് ബാങ്കില്ലെന്ന് പറഞ്ഞ വിമർശകരുടെ വായടപ്പിച്ചുകൊണ്ട് സംസ്ഥാനത്തെ ബിജെപിയുടെ വോട്ട് വിഹിതം ചരിത്രത്തിലെ ഏറ്റവും ഉയർന്ന നിരക്കായ 19.21 ശതമാനത്തിൽ എത്തിനിൽക്കുകയായിരുന്നു.
ആ ഒരു വലിയ രാഷ്ട്രീയ മുന്നേറ്റത്തിന്റെ തുടർച്ചയാണ് ഇപ്പോൾ നിയമസഭാ തിരഞ്ഞെടുപ്പിലും വലിയ രീതിയിൽ പ്രതിഫലിച്ചിരിക്കുന്നത്. തങ്ങൾ ഒരിക്കലും ജയിക്കില്ലെന്ന് ഉറപ്പിച്ചു പറഞ്ഞവരുടെ കോട്ടകൾ തകർത്തുകൊണ്ടാണ് ഇത്തവണ മൂന്ന് മണ്ഡലങ്ങളിൽ ബിജെപി വൻ വിജയം കൊയ്തിരിക്കുന്നത്. അതിൽ ഏറ്റവും ശ്രദ്ധേയമായത് കൊല്ലം ജില്ലയിലെ ചാത്തന്നൂരിലെ വിജയമാണ്. ബിജെപിയുടെ രാഷ്ട്രീയ വിജയസാധ്യതകളുടെ പട്ടികയിൽ ആദ്യഘട്ടത്തിൽ ഒരു രാഷ്ട്രീയ നിരീക്ഷകനും മുൻപന്തിയിൽ എഴുതിവെക്കാതിരുന്ന, ഇടതുകോട്ടയായിരുന്ന ചാത്തന്നൂരിനെ ശ്രദ്ധേയമാക്കിയത് അധ്യാപകൻ കൂടിയായ ബി. ബി. ഗോപകുമാറാണ്. കഴിഞ്ഞ രണ്ട് തവണയും നേരിയ വ്യത്യാസത്തിൽ പരാജയപ്പെട്ട് രണ്ടാമത് എത്തിയിട്ടും, ഇനി ശ്രമിച്ചിട്ട് കാര്യമില്ലെന്ന് പരിഹസിച്ചവർക്ക് മുന്നിൽ മണ്ഡലത്തിൽ തുടർച്ചയായി നടത്തിയ ജനകീയ ഇടപെടലുകളാണ് കൊല്ലം ജില്ലയിൽ നിന്നുള്ള ആദ്യത്തെ ബിജെപി എംഎൽഎ എന്ന ചരിത്ര നേട്ടത്തിലേക്ക് അദ്ദേഹത്തെ എത്തിച്ചത്. ഇപ്പോൾ പതിനാറാം നിയമസഭയിൽ മുപ്പത്തിമൂന്നാമനായി അദ്ദേഹം സത്യപ്രതിജ്ഞ ചെയ്തപ്പോൾ അത് ചാത്തന്നൂരിന്റെ ചരിത്രമാറ്റമായി മാറി.
മറ്റൊരു പ്രധാന വിജയം തലസ്ഥാന നഗരിയിലെ കഴക്കൂട്ടം മണ്ഡലത്തിലാണ്. മുൻ രാജ്യസഭാ എംപിയും കേന്ദ്ര പാർലമെന്ററികാര്യ സഹമന്ത്രിയുമായിരുന്ന വി. മുരളീധരനാണ് കടുത്ത പോരാട്ടത്തിനൊടുവിൽ സിറ്റിംഗ് എംഎൽഎയെ പരാജയപ്പെടുത്തിയത്. . അറുപത്തിനാലാമനായി സത്യപ്രതിജ്ഞ ചെയ്ത അദ്ദേഹം, കഴക്കൂട്ടത്തെ ജനങ്ങളുടെ ആഗ്രഹത്തിന് അനുസരിച്ച് മണ്ഡലത്തിലെ വികസന പ്രവർത്തനങ്ങൾക്ക് തുടക്കം കുറിക്കുകയാണെന്ന് വ്യക്തമാക്കി. മുന്കേന്ദ്രമന്ത്രിയെന്ന നിലയിലുള്ള അദ്ദേഹത്തിന്റെ ഭരണപരിചയം ഇനി കേരളത്തിന്റെ പുരോഗതിക്കായി നിയമസഭയിൽ ഉപയോഗിക്കപ്പെടും. ബിജെപിയുടെ ഈ ചരിത്ര മുന്നേറ്റത്തിന് നേതൃത്വം നൽകിച്ച സംസ്ഥാന അധ്യക്ഷൻ രാജീവ് ചന്ദ്രശേഖറാണ് നേമം മണ്ഡലം തിരിച്ചുപിടിച്ച് നിയമസഭയിലേക്ക് എൺപത്തിമൂന്നാമനായി സത്യപ്രതിജ്ഞ ചെയ്യുന്നത്.
ബിജെപിയെ സംബന്ധിച്ച് ഇത് ചരിത്രപരമായ ദിനമാണെന്നും പ്രധാനമന്ത്രി നരേന്ദ്ര മോദിയുടെ വികസന രാഷ്ട്രീയം ഇനി കേരള നിയമസഭ കാണുമെന്നും അദ്ദേഹം വ്യക്തമാക്കിയിട്ടുണ്ട്. പരസ്പരമുള്ള രാഷ്ട്രീയ ആരോപണങ്ങൾക്കും വ്യക്തിഹത്യകൾക്കും പകരം തൊഴിൽ, വിദ്യാഭ്യാസം, ആരോഗ്യം, വിലക്കയറ്റം, ലഹരി വ്യാപനം തുടങ്ങിയ ജനകീയ പ്രശ്നങ്ങളിലൂന്നിയുള്ള ചർച്ചകൾക്കായിരിക്കും ബിജെപി നിയമസഭയ്ക്കുള്ളിൽ പ്രാധാന്യം നൽകുക.
കേരള നിയമസഭയുടെ ചരിത്രത്തിൽ ആദ്യമായാണ് മൂന്ന് അംഗങ്ങളുമായി ബിജെപി ഒരു നിർണ്ണായക ശക്തിയായി സഭയിലേക്ക് പ്രവേശിക്കുന്നത്. പാളയം രക്തസാക്ഷി മണ്ഡപത്തിൽ പുഷ്പാർച്ചന നടത്തിയ ശേഷമാണ് ഈ മൂന്ന് എംഎൽഎമാരും നിയമസഭയിലേക്ക് എത്തിയത്. കേന്ദ്ര സർക്കാരിന്റെ വികസന പദ്ധതികൾ കേരളത്തിന്റെ കോണുകളിലേക്ക് എത്തിക്കുമെന്ന “മോദി ഗ്യാരണ്ടി”യുടെ വിജയമായാണ് അണികൾ ഇതിനെ കാണുന്നത്. അക്കൗണ്ട് തുറക്കില്ലെന്ന് അഹങ്കാരത്തോടെ പറഞ്ഞ വിമർശകർക്ക് മുന്നിൽ, വിഭജന രാഷ്ട്രീയത്തിന് പകരം കൃത്യമായ പരിഹാരങ്ങൾ നിർദ്ദേശിക്കുന്ന ഒരു ഉത്തരവാദിത്തമുള്ള രാഷ്ട്രീയ സംസ്കാരം ഉയർത്തിപ്പിടിക്കാനാണ് ബിജെപിയുടെ ഈ മൂന്ന് ജനപ്രതിനിധികളും നിയമസഭയിലേക്ക് എത്തിയിരിക്കുന്നത്. വരും ദിവസങ്ങളിൽ ഈ മൂന്ന് അംഗങ്ങളുടെ സാന്നിധ്യം കേരള രാഷ്ട്രീയത്തെയും നിയമസഭാ ചർച്ചകളെയും എങ്ങനെ മാറ്റിമറിക്കുമെന്ന് തന്നെയാണ് കേരളം ഉറ്റുനോക്കുന്നത്,
നിയമസഭയുടെ പടവുകൾ കയറുന്ന ഈ മൂന്ന് ജനപ്രതിനിധികൾ കേരള രാഷ്ട്രീയത്തിലെ ഒരു പുതിയ ശക്തികേന്ദ്രത്തിന്റെ പ്രതീകങ്ങളാണ്. അവഗണിച്ചവർക്കും തള്ളിപ്പറഞ്ഞവർക്കും മുന്നിൽ വികസനത്തിന്റെ പുതിയ രാഷ്ട്രീയ സംസ്കാരം ഉയർത്തിപ്പിടിച്ച് ഇവർ മുന്നേറുമ്പോൾ, കേരളത്തിലെ ജനാധിപത്യ സംവിധാനം കൂടുതൽ കരുത്താർജ്ജിക്കുകയാണ് ചെയ്യുന്നത്. വരും വർഷങ്ങളിൽ കേരളം കാണാൻ പോകുന്നത് കേവലമൊരു അക്കൗണ്ട് ചർച്ചകളല്ല, മറിച്ച് ജനങ്ങളുടെ ആവശ്യങ്ങൾക്കൊപ്പം നിൽക്കുന്ന യഥാർത്ഥ വികസന മത്സരങ്ങളായിരിക്കും
