ഗൾഫ് ലോകം ബലിപെരുന്നാൾ ആഘോഷങ്ങളിലേക്ക് കടക്കാനിരിക്കെ, വിശ്വാസികളെ വരവേൽക്കാൻ വിപുലമായ ഒരുക്കങ്ങളുമായി ഷാർജ. എമിറേറ്റിലെ വിവിധ നഗരങ്ങളിലായി 698 പള്ളികളും ഈദ്ഗാഹുകളുമാണ് പെരുന്നാൾ നമസ്കാരത്തിനായി ഷാർജ ഇസ്ലാമിക കാര്യ വകുപ്പ് പൂർണ്ണ സജ്ജമാക്കിയിരിക്കുന്നത്. പെരുന്നാൾ ദിനത്തിൽ വലിയ തോതിൽ പ്രതീക്ഷിക്കുന്ന വിശ്വാസികളുടെ തിരക്ക് പൂർണ്ണമായും നിയന്ത്രിക്കാനും എല്ലാവർക്കും ഒരേപോലെ സൗകര്യപ്രദമായി നമസ്കാരത്തിൽ പങ്കെടുക്കാനും വേണ്ടിയാണ് ഇസ്ലാമിക കാര്യ വകുപ്പ് വിപുലമായ ഈ ക്രമീകരണങ്ങൾ ഒരുക്കിയിട്ടുള്ളത്.
വ്യത്യസ്ത നഗരങ്ങളിലെ വിശ്വാസികൾക്കായി പെരുന്നാൾ നമസ്കാര സമയക്രമവും അധികൃതർ മുൻകൂട്ടി പ്രഖ്യാപിച്ചിട്ടുണ്ട്. ഷാർജ സിറ്റി, അൽ ഹംരിയ, അൽ മദാം, മ്ലെയ്ഹ എന്നിവിടങ്ങളിൽ രാവിലെ 5:45-നാണ് പെരുന്നാൾ നമസ്കാരം നിശ്ചയിച്ചിരിക്കുന്നത്. അൽ ദൈദ്, അൽ ബതായ പ്രദേശങ്ങളിൽ രാവിലെ 5:44-നും, ഷാർജ ഈസ്റ്റേൺ റീജിയനിൽ രാവിലെ 5:42-നും നമസ്കാരം നടക്കും.വിദേശികളായ വലിയൊരു വിഭാഗം വിശ്വാസികൾക്ക് ഏറെ ആശ്വാസമേകുന്ന പ്രഖ്യാപനവും മന്ത്രാലയത്തിന്റെ ഭാഗത്തുനിന്ന് ഉണ്ടായിട്ടുണ്ട്. അറബി ഇതര ഭാഷകൾ സംസാരിക്കുന്നവർക്കായി ഒട്ടനവധി പള്ളികളിൽ പ്രത്യേക സൗകര്യം ഒരുക്കിയിട്ടുണ്ട്. മലയാളം, ഉറുദു, തമിഴ്, ഇംഗ്ലീഷ് ഉൾപ്പെടെയുള്ള ഭാഷകളിൽ പെരുന്നാൾ ഖുതുബ ശ്രവിക്കാൻ തൊണ്ണൂറിലധികം പള്ളികളാണ് മന്ത്രാലയം എമിറേറ്റിലുടനീളം പ്രത്യേകം നിശ്ചയിച്ചിരിക്കുന്നത്.
പെരുന്നാൾ നമസ്കാരം തികച്ചും സുഗമമായും വ്യവസ്ഥാപിതമായും നടക്കുന്നുണ്ടെന്ന് ഉറപ്പാക്കാൻ പള്ളികളിൽ സമഗ്രമായ ശുചീകരണ പ്രവർത്തനങ്ങളും മുൻകരുതൽ അറ്റകുറ്റപ്പണികളും ഇതിനോടകം തന്നെ പൂർത്തിയാക്കിയിട്ടുണ്ട്. പള്ളികളിലെ സൗണ്ട് സിസ്റ്റങ്ങൾ കൃത്യമായി പരിശോധിക്കുകയും സുരക്ഷാ ക്രമീകരണങ്ങൾ വിലയിരുത്തുകയും ചെയ്തിട്ടുണ്ട്. എമിറേറ്റിലുടനീളമുള്ള വിശ്വാസികൾക്ക് സുരക്ഷിതവും സമാധാനപരവുമായ അന്തരീക്ഷത്തിൽ പെരുന്നാൾ നമസ്കാരം നിർവ്വഹിക്കാനുള്ള നിരന്തരമായ ശ്രമങ്ങളുടെ ഭാഗമായാണ് ഈ ഒരുക്കങ്ങളെന്ന് ഇസ്ലാമിക കാര്യ വകുപ്പ് വ്യക്തമാക്കി.
