ഇതാണ് വികസിത കേരളംമോദി ഗ്യാരണ്ടിയിൽ മാറ്റത്തിന്റെ കാഹളം

മാറാത്തത് ഇനി മാറും!” – ഈ ഒരൊറ്റ ഉറപ്പിൽ നിന്നാണ് വികസിത കേരളത്തിലേക്കുള്ള ബിജെപി – എൻഡിഎ സഖ്യത്തിന്റെ പ്രയാണമാരംഭിക്കുന്നത്.
ബിജെപി അവരുടെ തിരഞ്ഞെടുപ്പ് പത്രിക പുറത്ത് ഇറക്കി കഴിഞ്ഞു
വെറുമൊരു തിരഞ്ഞെടുപ്പ് കാലത്തെ വാഗ്ദാന പത്രികയല്ല ഇത്, മറിച്ച് 2026 മുതൽ 2031 വരെയുള്ള അഞ്ച് വർഷങ്ങളിൽ കേരളം എങ്ങനെയുള്ള ഒരു വികസന കുതിപ്പിന് സാക്ഷ്യം വഹിക്കണം എന്നതിനെക്കുറിച്ചുള്ള കൃത്യമായ മാർഗരേഖയാണിത്. പ്രധാനമന്ത്രി നരേന്ദ്ര മോദിയുടെ നേരിട്ടുള്ള മേൽനോട്ടത്തിലും പിന്തുണയിലും വിഭാവനം ചെയ്തിരിക്കുന്ന ഈ 120 പേജുകളുള്ള ബൃഹത്തായ പദ്ധതിയിൽ എന്തൊക്കെ മാറ്റങ്ങളാണ് നിങ്ങൾക്കായി കാത്തിരിക്കുന്നത്? ആ മാറ്റങ്ങൾ ഓരോന്നായി നമുക്ക് പരിശോധിക്കാം.കേരളത്തിന്റെ സാമ്പത്തിക അടിത്തറയെ തകർക്കുന്ന കടക്കെണിയിൽ നിന്ന് സംസ്ഥാനത്തെ മോചിപ്പിക്കുകയാണ് ഈ മാർഗരേഖയുടെ പ്രാഥമിക ലക്ഷ്യം. സാധാരണക്കാരന്റെ കുടുംബ ബജറ്റിന് കരുത്തേകാൻ ഓണം, ക്രിസ്മസ് വേളകളിൽ വർഷത്തിൽ രണ്ട് പാചകവാതക സിലിണ്ടറുകൾ സൗജന്യമായി നൽകും. ക്ഷേമ പെൻഷനുകൾ വർദ്ധിപ്പിക്കുന്നതിലൂടെ പാവപ്പെട്ടവരുടെ സാമൂഹിക സുരക്ഷ ഉറപ്പാക്കും. ഭരണതലത്തിലെ അഴിമതി തുടച്ചുനീക്കാൻ ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യ പ്രയോജനപ്പെടുത്തി സുതാര്യമായ ജനകീയ ഭരണം ബിജെപി ഉറപ്പുനൽകുന്നു
കേരളത്തിന്റെ ആരോഗ്യ മേഖലയ്ക്ക് പുത്തൻ ഉണർവ് നൽകിക്കൊണ്ട് സംസ്ഥാനത്തിന് സ്വന്തമായി ഒരു എയിംസ് (AIIMS) യാഥാർത്ഥ്യമാക്കും. എല്ലാവർക്കും മിതമായ നിരക്കിൽ ചികിത്സ ഉറപ്പാക്കാൻ സമഗ്ര ആരോഗ്യ ഇൻഷുറൻസ് പദ്ധതിയും, 24 മണിക്കൂറും പ്രവർത്തിക്കുന്ന സൗജന്യ ആംബുലൻസ് സേവനവും നടപ്പിലാക്കും. ഓരോ വീട്ടിലും നേരിട്ട് ആരോഗ്യ പരിരക്ഷ എത്തിക്കാൻ മൊബൈൽ ആശുപത്രികൾ സജ്ജമാക്കും. കർഷകർക്ക് അർഹമായ താങ്ങുവിലയും പിന്തുണയും ഉറപ്പാക്കുന്നതിലൂടെ ഭക്ഷ്യസമൃദ്ധമായ ഒരു കേരളം കെട്ടിപ്പടുക്കും. 
വികസിത കേരള നിർമ്മിതിക്കായി അതിവേഗ റെയിൽ ശൃംഖലയും റെയിൽവേ വിപുലീകരണവും നടപ്പിലാക്കും. നിലമ്പൂർ – നഞ്ചൻകോട് റെയിൽവേ പദ്ധതി പുനരുജ്ജീവിപ്പിക്കുകയും തൃശൂർ – ഗുരുവായൂർ പാത തിരൂരിലേക്ക് നീട്ടുകയും ചെയ്യും. വിഴിഞ്ഞം അന്താരാഷ്ട്ര തുറമുഖത്തെ ആഗോള നിലവാരത്തിലുള്ള വ്യവസായ-ചരക്കുനീക്ക കേന്ദ്രമായി മാറ്റി കേരളത്തിന് അതിന്റെ പൂർണ്ണ ഗുണഫലം ലഭ്യമാക്കും. റോഡ് വികസനത്തിൽ വലിയ മാറ്റങ്ങൾ കൊണ്ടുവരുന്നതിനൊപ്പം കൊച്ചിക്ക് പുറമെ തിരുവനന്തപുരം, കോഴിക്കോട് നഗരങ്ങളിലും അതിവേഗ മെട്രോ ശൃംഖല വ്യാപിപ്പിക്കും. ഇത് യുവാക്കൾക്ക് സ്വന്തം നാട്ടിൽ തന്നെ ലക്ഷക്കണക്കിന് തൊഴിലവസരങ്ങൾ സൃഷ്ടിക്കുന്ന ഒരു വലിയ തൊഴിൽ വിപ്ലവത്തിന് വഴിയൊരുക്കും
നമ്മുടെ കുട്ടികളുടെ ഭാവി സുരക്ഷിതമാക്കാൻ 12-ാം ക്ലാസ് വരെ സൗജന്യ ഐച്ഛിക ഇംഗ്ലീഷ് മീഡിയം വിദ്യാഭ്യാസം മാർഗരേഖ വാഗ്ദാനം ചെയ്യുന്നു. ഉന്നതവിദ്യാഭ്യാസ മേഖലയെ വ്യവസായങ്ങളുമായി നേരിട്ട് ബന്ധിപ്പിച്ച് തൊഴിലധിഷ്ഠിതമായി പരിഷ്കരിക്കും. ലഹരിമുക്ത കേരളം എന്ന ലക്ഷ്യത്തോടെ ക്യാമ്പസുകളിൽ നിന്ന് ലഹരി തുടച്ചുനീക്കാൻ കർശന നടപടികൾ സ്വീകരിക്കുകയും കുറ്റകൃത്യങ്ങളുടെ നിരക്ക് കുറയ്ക്കുകയും ചെയ്യും
സ്ത്രീകൾക്കും കുട്ടികൾക്കും പൂർണ്ണ സുരക്ഷ ഉറപ്പാക്കുന്ന ‘നാരി സുരക്ഷ’ പദ്ധതികൾക്ക് മുൻഗണന നൽകും. ആരാധനാലയങ്ങളുടെ ഭരണം രാഷ്ട്രീയ ഇടപെടലുകളിൽ നിന്ന് മോചിപ്പിച്ച് ഭക്തർക്ക് കൈമാറുമെന്ന വിപ്ലവകരമായ പ്രഖ്യാപനവും ഇതിലുണ്ട്. ശബരിമലയുടെ സമഗ്ര വികസനത്തിനായി പ്രത്യേക പദ്ധതികൾ ആവിഷ്കരിക്കും. പട്ടികജാതി, പട്ടികവർഗ്ഗ, പിന്നാക്ക വിഭാഗങ്ങളുടെ ശാക്തീകരണത്തിനായി ഏകലവ്യ മോഡൽ സ്കൂളുകൾ ഉൾപ്പെടെയുള്ള പ്രത്യേക പാക്കേജുകൾ നടപ്പിലാക്കും
തീരദേശ നിവാസികളുടെ സുരക്ഷയ്ക്കായി കടൽഭിത്തികളും പുലിമുട്ടുകളും നിർമ്മിക്കുന്നതിനൊപ്പം കടൽതീരങ്ങളെ അന്താരാഷ്ട്ര നിലവാരമുള്ള ‘ബ്ലൂ ഫ്ലാഗ്’ ബീച്ചുകളായി മാറ്റും. വന്യജീവി ആക്രമണങ്ങളിൽ നിന്ന് കർഷകരെയും മലയോര നിവാസികളെയും സംരക്ഷിക്കാൻ ശാസ്ത്രീയമായ ബഹുതല പരിഹാരങ്ങൾ നടപ്പിലാക്കും. മുല്ലപ്പെരിയാർ വിഷയത്തിൽ ‘കേരളത്തിന് സുരക്ഷ, തമിഴ്‌നാടിന് ജലം’ എന്ന നയം നടപ്പിലാക്കും. മാലിന്യമുക്ത കേരളത്തിനായി ആധുനിക സംസ്കരണ സംവിധാനങ്ങളും ‘സീറോ വേസ്റ്റ്’ പദ്ധതികളും ഏർപ്പെടുത്തും.