സൂപ്പർസ്റ്റാർ രജനികാന്തിനെ നായകനാക്കി നെൽസൺ സംവിധാനം ചെയ്ത ‘ജയിലർ 2’ ആഗോള ബോക്സ് ഓഫീസിൽ തരംഗമാകുന്നു. ഒക്ടോബർ 15-ന് തിയറ്ററുകളിലെത്തിയ ചിത്രം ഇതിനോടകം ആഗോളതലത്തിൽ 710 കോടിയോളം രൂപ വാരിക്കൂട്ടിയതായി സാക്നിൽക്ക് റിപ്പോർട്ട് ചെയ്യുന്നു. കേരളത്തിൽ 800 സ്ക്രീനുകളിൽ ഓൾ ടൈം റെക്കോർഡ് റിലീസായാണ് ചിത്രം എത്തിയത്. റിലീസ് ദിനത്തിൽ മാത്രം 4000 ഷോകളാണ് കേരളത്തിൽ ചിത്രത്തിന് ലഭിച്ചത്.
സൺ പിക്ചേഴ്സിന്റെ ബാനറിൽ കലാനിധി മാരൻ നിർമ്മിച്ച ചിത്രം കേരളത്തിൽ തിയറ്ററുകളിലെത്തിച്ചത് ശ്രീ ഗോകുലം ഗോപാലന്റെ ശ്രീ ഗോകുലം മൂവീസാണ്. മലയാളത്തിന്റെ മെഗാതാരം മോഹൻലാലിന്റെ സാന്നിധ്യമാണ് ചിത്രത്തിന് കേരളത്തിൽ ഇത്രയധികം ആവേശം സൃഷ്ടിക്കാൻ പ്രധാന കാരണമായത്. ആദ്യ ഭാഗത്തിൽ മാത്യു എന്ന കഥാപാത്രമായി അതിഥി വേഷത്തിലെത്തി പ്രേക്ഷകരെ കൈയിലെടുത്ത മോഹൻലാൽ രണ്ടാം ഭാഗത്തിലും മാസ്സ് പ്രകടനവുമായാണ് എത്തിയിരിക്കുന്നത്. രജനികാന്തും മോഹൻലാലും വീണ്ടും ബിഗ് സ്ക്രീനിൽ ഒന്നിച്ചപ്പോൾ പ്രേക്ഷകർക്ക് അത് വലിയൊരു ദൃശ്യവിരുന്നായി മാറി.ബ്ലോക്ക്ബസ്റ്റർ ചിത്രമായ ‘ജയിലറി’ന് ശേഷം മുത്തുവേൽ പാണ്ഡ്യനായി രജനികാന്ത് തിരികെയെത്തുന്ന ചിത്രത്തിൽ കന്നഡ താരം ശിവ രാജ്കുമാറും വീണ്ടും എത്തുന്നുണ്ട്. ഇവരെക്കൂടാതെ സുരാജ് വെഞ്ഞാറമൂട്, എസ്.ജെ. സൂര്യ, വിദ്യ ബാലൻ, മിഥുൻ ചക്രവർത്തി, യോഗി ബാബു, ഹക്കീം ഷാജഹാൻ തുടങ്ങിയ വലിയ താരനിര തന്നെ ചിത്രത്തിൽ വേഷമിട്ടിരിക്കുന്നു. അനിരുദ്ധ് രവിചന്ദർ സംഗീതമൊരുക്കിയ ചിത്രത്തിന്റെ ഛായാഗ്രഹണം വിജയ് കാർത്തിക് കണ്ണനും എഡിറ്റിംഗ് ആർ. നിർമ്മലുമാണ് നിർവ്വഹിച്ചിരിക്കുന്നത്.
