കണ്ണൂർ:കണ്ണൂർ സർവകലാശാലയിൽ ചോദ്യപേപ്പർ ലഭിക്കാത്തതിനെ തുടർന്ന് പരീക്ഷകൾ മുടങ്ങി.ശനിയാഴ്ച നടക്കേണ്ട രണ്ടാം സെമസ്റ്റർ എം ഡി സി പരീക്ഷകളാണ് മുടങ്ങിയത്.സർകലാശാലയിൽ 68 വിഷയങ്ങളിലായിരുന്നു ഇന്ന് പരീക്ഷ നടക്കേണ്ടിയിരുന്നത്.അതിൽ 54 വിഷയങ്ങളിലെ ചോദ്യ പേപ്പറുകൾ രാവിലെ 10 മണിക്ക് മുൻപായി കോളേജുകളിൽ എത്തി.എന്നാൽ എം ഡി സിയിൽ ഉൾപ്പെടുന്ന ഒമ്പത് വിഷയങ്ങളുടെ ചോദ്യ പേപ്പർ തയാറായില്ല. പരീക്ഷ കേന്ദ്രങ്ങളിലെത്തിയ വിദ്യാർത്ഥികൾ പരീക്ഷയ്ക്ക് തൊട്ട് മുമ്പാണ് പരീക്ഷ മുടങ്ങിയെന്ന വിവരം അറിഞ്ഞത്.
ബോർഡ് ഓഫ് സ്റ്റഡീസ് തയാറാക്കിയ ചോദ്യങ്ങൾ പരീക്ഷയ്ക്കായി സോഫ്റ്റ് വെയറിലൂടെ ക്രമീകരിച്ചപ്പോൾ ചില പേപ്പറുകളിൽ പ്രശ്നങ്ങൾ സംഭവിച്ചെന്നാണ് സർവകലാശാല പ്രതികരിച്ചത്.അത് പരിഹരിക്കാൻ നിശ്ചിത സമയത്ത് സാധിക്കാതെ വന്നതോടെയാണ് പരീക്ഷകൾ മാറ്റിയതെന്നും സർവകലാശാല അറിയിച്ചു.
