പിണറായിക്കും ബാലഗോപാലിനും വൻ തിരിച്ചടി

കേരളം വികസിച്ചു വികസിച്ചു ഇപ്പോൾ എവിടെ എത്തി നിൽക്കുന്നു എന്ന് ചോദിച്ചാൽ, നേരെ കടക്കെണിയുടെ നടുമുറ്റത്ത്! നമ്മുടെ മുഖ്യമന്ത്രി പിണറായി വിജയനും, അദ്ദേഹത്തിന്റെ വലംകൈയ്യായ ധനമന്ത്രി കെ.എൻ. ബാലഗോപാലും ചേർന്ന് നടത്തുന്ന പുതിയ ‘കടപ്പത്ര’ സർക്കസിനെക്കുറിച്ചാണ് ഇന്ന് പറയാനുള്ളത്. കയ്യിൽ ചില്ലിക്കാശില്ല, പക്ഷേ ഗമയ്ക്ക് ഒരു കുറവുമില്ല. 3,700 കോടി രൂപ കൂടി കടമെടുക്കാൻ തീരുമാനിച്ചിരിക്കുന്നു. ഇതാണ് ഇവരുടെ പുതിയ അടവ്. കടം വാങ്ങി മുടിഞ്ഞു നിൽക്കുമ്പോഴും ‘വികസനം വരുന്നു’ എന്ന് പറഞ്ഞ് ജനങ്ങളെ പറ്റിക്കാൻ ഇവർക്ക് പ്രത്യേക ഒരു തൊലിക്കട്ടി തന്നെയുണ്ട്. ലോകം മുഴുവൻ സാമ്പത്തിക ശാസ്ത്രം പഠിക്കുമ്പോൾ, ബാലഗോപാൽ സാർ പഠിക്കുന്നത് എങ്ങനെ കടം വാങ്ങി അടുത്ത മാസം തള്ളിനീക്കാം എന്ന ‘അത്ഭുത വിദ്യ’യാണ്!നമ്മുടെ ധനമന്ത്രി ബാലഗോപാലിനെ സമ്മതിക്കണം. ഖജനാവ് കാലിയാണെന്ന് ചോദിക്കുമ്പോൾ അദ്ദേഹം പറയും “കേന്ദ്രമാണ് പ്രതിസന്ധി” എന്ന്. കേന്ദ്രം ശ്വാസം മുട്ടിക്കുന്നു എന്ന് പറഞ്ഞ് കരയുന്ന ഇദ്ദേഹം, അതേ കേന്ദ്രം നൽകിയ ഇളവുകൾ ഉപയോഗിച്ച് വീണ്ടും കോടികൾ കടമെടുക്കാൻ ക്യൂ നിൽക്കുകയാണ്. ഈ 3,700 കോടി കിട്ടിയാൽ ഉടനെ ഇദ്ദേഹം പറയും, “കണ്ടോ, ഞങ്ങൾ ക്ഷേമ പെൻഷൻ കൊടുത്തു” എന്ന്. സ്വന്തം തറവാട് പണയം വെച്ച് അയൽക്കാരന് സദ്യ വിളമ്പുന്ന ഈ വിദ്യയ്ക്ക് ‘ജനക്ഷേമം’ എന്നാണോ അതോ ‘കടക്കെണി’ എന്നാണോ പറയേണ്ടത്? കടപ്പത്രം ഇറക്കി പണം വാങ്ങുന്നതിൽ ഇദ്ദേഹം ഒരു റെക്കോർഡ് തന്നെ ഇടും. അടുത്ത തവണ ബജറ്റ് അവതരിപ്പിക്കുമ്പോൾ “നമുക്ക് ഇനി പണയം വെക്കാൻ മണ്ണില്ലാത്തതുകൊണ്ട് വായു പണയം വെക്കാം” എന്ന് ഇദ്ദേഹം പറഞ്ഞാലും അത്ഭുതപ്പെടാനില്ല!
ഇനി നമ്മുടെ ക്യാപ്റ്റന്റെ കാര്യം. കേരളത്തെ നയിക്കുന്നത് ‘ഇരട്ടച്ചങ്കൻ’ ആണെന്നാണ് പറയുന്നത്. പക്ഷേ കടം വാങ്ങുന്ന കാര്യത്തിൽ ഇദ്ദേഹത്തിന് പത്തു ചങ്കാണോ എന്ന് സംശയിക്കണം. അടുത്ത തിരഞ്ഞെടുപ്പ് വരുന്നു, വോട്ടുറപ്പിക്കാൻ ക്ഷേമ പെൻഷൻ കൊടുത്തേ പറ്റൂ. അതിന് പണമില്ലെങ്കിൽ എന്ത് ചെയ്യും? നേരെ കടപ്പത്ര വിപണിയിലേക്ക്! അടുത്ത തവണ അധികാരത്തിൽ വരുന്നത് ആരായാലും അവർക്ക് ഒരു രൂപ പോലും ബാക്കിവെക്കാതെ ഖജനാവ് അടിച്ചുവാരി കൊണ്ടുപോകാനാണ് ഈ നീക്കം. “ഞാൻ ഭരിക്കുമ്പോൾ കടം വാങ്ങി ആഘോഷിക്കും, അടുത്തവൻ വരുമ്പോൾ അവൻ അനുഭവിക്കട്ടെ” എന്ന ഈ ലൈൻ ഉണ്ടല്ലോ, അത് ശരിക്കും ഒരു തറവാടി കാരണവരുടെ സ്വഭാവം തന്നെയാണ്. കടമെടുത്തു മുടിയുന്ന കേരളം എന്ന് ലോകം പരിഹസിക്കുമ്പോഴും കണ്ണടച്ച് ഇരുട്ടാക്കി ‘നമ്പർ വൺ’ എന്ന് പാടി നടക്കുകയാണ് പിണറായിയും സംഘവും
ജനങ്ങളെ ഇനിയും എത്ര കാലം പറ്റിക്കാൻ പറ്റും? ട്രഷറിയിൽ കരാറുകാർ വരി നിൽക്കുന്നു, തദ്ദേശ സ്ഥാപനങ്ങളിൽ പണമില്ല, കെ.എസ്.ആർ.ടി.സി ശമ്പളമില്ലാതെ ഓടുന്നു. ഇത്രയൊക്കെ ദുരന്തങ്ങൾ കൺമുന്നിൽ നടക്കുമ്പോഴാണ് ഈ 4000 രൂപ പെൻഷൻ കാട്ടി വോട്ട് പിടിക്കാനുള്ള നാടകം. വരും തലമുറയുടെ കഴുത്തിൽ ലക്ഷങ്ങളുടെ കടപ്പാശമാണ് ഇവർ മുറുക്കുന്നത്. ബാലഗോപാലിന്റെ കയ്യിലുള്ള കണക്കുപുസ്തകം ശരിക്കും ഒരു ‘മാന്ത്രിക പുസ്തകമാണ്’—അതിൽ കടം മാത്രമേയുള്ളൂ, വരുമാനമില്ല! ഈ സർക്കാരിന്റെ കാലാവധി കഴിയുമ്പോൾ കേരളം എന്ന ഈ സുന്ദര ഭൂമി ഒരു വലിയ കടപ്പത്രമായി മാറുമോ എന്ന് ഭയപ്പെടേണ്ടിയിരിക്കുന്നു. ഇനിയും ഈ നാടകം തുടരാൻ അനുവദിക്കണോ എന്ന് ചിന്തിക്കേണ്ടത് നമ്മൾ ഓരോരുത്തരുമാണ്. കടമെടുത്തു മുടിക്കുന്ന ഈ ‘ഇരട്ടച്ചങ്കൻ’ ഭരണത്തിന് ജനങ്ങൾ തന്നെ മറുപടി നൽകണം.