കുട്ടികളുടെ സോഷ്യൽ മീഡിയ അക്കൗണ്ടുകൾ പൂട്ടും? സുപ്രീം കോടതിയുടെ ചരിത്ര ഉത്തരവ്!

നിങ്ങളുടെ വീട്ടിലെ 15 വയസ്സിൽ താഴെയുള്ള കുട്ടികൾക്ക് സ്വന്തമായി ഇൻസ്റ്റാഗ്രാം, ഫേസ്ബുക്ക് അല്ലെങ്കിൽ ട്വിറ്റർ അക്കൗണ്ടുകൾ ഉണ്ടോ? ഉണ്ടെങ്കിൽ ഈ നിമിഷം ഓരോ മാതാപിതാക്കളും നിർബന്ധമായും അറിഞ്ഞിരിക്കേണ്ട ഏറ്റവും പ്രധാനപ്പെട്ട ഒരു സത്യമുണ്ട്. നിങ്ങളുടെ കുട്ടി ഉപയോഗിക്കുന്ന ആ സോഷ്യൽ മീഡിയ അക്കൗണ്ട് നമ്മുടെ രാജ്യത്തെ നിലവിലുള്ള നിയമപ്രകാരം തികച്ചും നിയമവിരുദ്ധവും അസാധുവും ആണെന്ന കേൾക്കുമ്പോൾ ഒരുപക്ഷേ നിങ്ങൾക്ക് അതിശയമോ ഞെട്ടലോ തോന്നാം. എന്നാൽ കഴിഞ്ഞ ദിവസം ഇന്ത്യയുടെ പരമോന്നത നീതിപീഠമായ സുപ്രീം കോടതി വമ്പൻ വിദേശ ടെക് ഭീമന്മാർക്ക് നേരെ തൊടുത്തത് സമാനതകളില്ലാത്ത ഒരു അന്ത്യശാസനമായിരുന്നു. 18 വയസ്സ് തികയാത്ത ഒരു കുട്ടിക്കും ഇനിമുതൽ ഇന്ത്യയിൽ സ്വന്തമായി ഒരു സോഷ്യൽ മീഡിയ അക്കൗണ്ടും തുടങ്ങാൻ സാധിക്കാത്ത വിധം അതിനുള്ള നിയമപരമായ പഴുതുകൾ പൂർണ്ണമായും അടയ്ക്കാൻ കേന്ദ്ര സർക്കാരിനോട് സുപ്രീം കോടതി കർശനമായി ആവശ്യപ്പെട്ടിരിക്കുകയാണ്. സ്വന്തം മുറിക്കുള്ളിൽ ഫോണിൽ നോക്കിയിരിക്കുന്ന നിങ്ങളുടെ കുട്ടി സുരക്ഷിതനാണെന്ന് നിങ്ങൾ വിശ്വസിക്കുന്നുണ്ടെങ്കിൽ ആ വിശ്വാസത്തെ തിരുത്തുന്ന ചില യാഥാർത്ഥ്യങ്ങളാണ് ഇതിന് പിന്നിലുള്ളത്.
ലാഭേച്ഛയില്ലാതെ പ്രവർത്തിക്കുന്ന ‘ജസ്റ്റ് റൈറ്റ്സ് ഫോർ ചിൽഡ്രൻ അലയൻസ്’ അഥവാ ജി.ആർ.സി.എ സുപ്രീം കോടതിയിൽ സമർപ്പിച്ച പൊതുതാൽപ്പര്യ ഹർജിയിൽ നിന്നാണ് ഈ നിയമപോരാട്ടത്തിന്റെ തുടക്കം. ട്വിറ്റർ, ഇൻസ്റ്റാഗ്രാം, ഫേസ്ബുക്ക് തുടങ്ങിയ പ്ലാറ്റ്‌ഫോമുകളിൽ പ്രായപൂർത്തിയാകാത്തവരെ അനുവദിക്കുന്നില്ലെന്ന് ഉറപ്പാക്കാൻ എന്തുകൊണ്ട് ഇന്ത്യയിൽ കൃത്യമായ സുരക്ഷാ സംവിധാനങ്ങൾ ഇല്ല എന്നതായിരുന്നു ഹർജിയിലെ പ്രധാന ചോദ്യം. ഈ ഹർജി പരിഗണിച്ച ചീഫ് ജസ്റ്റിസ് അധ്യക്ഷനായ ബെഞ്ച് വിദേശ ടെക് കമ്പനികളുടെ നിലപാടിനെതിരെ രൂക്ഷമായ ഭാഷയിലാണ് പ്രതികരിച്ചത്. 12-ഉം 13-ഉം വയസ്സുള്ള കുട്ടികൾക്ക് അക്കൗണ്ടുകൾ തുടങ്ങാൻ സോഷ്യൽ മീഡിയ പ്ലാറ്റ്‌ഫോമുകൾ എങ്ങനെ അനുമതി നൽകുമെന്നും ഇത് രാജ്യത്തെ നിയമത്തിന് തികച്ചും വിരുദ്ധമാണെന്നും കോടതി വ്യക്തമാക്കി. ഇന്ത്യ ഒരു പരമാധികാര രാജ്യമാണ്, ഇവിടെയുള്ള നിയമങ്ങൾ പാലിക്കാൻ ലോകത്തെ ഏത് വലിയ കമ്പനിയും ബാധ്യസ്ഥരുമാണ്. അമേരിക്കയിലെ നിയമങ്ങൾക്ക് കീഴിൽ രജിസ്റ്റർ ചെയ്ത ഈ വിദേശ കമ്പനികൾ അവിടുത്തെ നിബന്ധനകൾ അതേപടി ഇന്ത്യൻ ഡിജിറ്റൽ ഇടത്തിലേക്ക് അടിച്ചേൽപ്പിക്കാൻ അനുവദിക്കില്ലെന്ന് വ്യക്തമാക്കിയ കോടതി, ഇവരുടെ സോഫ്റ്റ്‌വെയറുകൾ ഇന്ത്യൻ നിയമങ്ങൾക്ക് അനുസൃതമായി മാറ്റാൻ നിർദ്ദേശം പുറപ്പെടുവിക്കണമെന്ന് കേന്ദ്ര സർക്കാരിനോട് ആവശ്യപ്പെടുകയും ചെയ്തു.
ഇവിടെ നമ്മൾ കൃത്യമായി മനസ്സിലാക്കേണ്ട ഒരു പ്രധാന നിയമമുണ്ട്, അതാണ് ഇന്ത്യൻ കോൺട്രാക്ട് ആക്ട് അഥവാ ഇന്ത്യൻ കരാർ നിയമം. നിങ്ങളോ നിങ്ങളുടെ കുട്ടിയോ ഒരു പുതിയ സോഷ്യൽ മീഡിയ അക്കൗണ്ട് തുടങ്ങുമ്പോൾ അവിടെ ‘I Agree’ അല്ലെങ്കിൽ സമ്മതിക്കുന്നു എന്നൊരു ബട്ടണിൽ ക്ലിക്ക് ചെയ്യാറില്ലേ? അത് കേവലമൊരു ക്ലിക്കല്ല, മറിച്ച് ആ കമ്പനിയുമായി നിങ്ങൾ ഉണ്ടാക്കുന്ന നിയമപരമായ ഒരു ഉപഭോക്തൃ കരാറാണ്. പ്ലാറ്റ്‌ഫോമിന്റെ സേവന നിബന്ധനകളും സ്വകാര്യതാ നയങ്ങളും നിങ്ങൾ വായിച്ചു മനസ്സിലാക്കി അംഗീകരിക്കുന്നു എന്നാണ് അതിനർത്ഥം. എന്നാൽ 1872-ലെ ഇന്ത്യൻ കോൺട്രാക്ട് ആക്ട് വളരെ വ്യക്തമായി പറയുന്നുണ്ട്, 18 വയസ്സിന് താഴെയുള്ള ഒരാൾക്ക് ഏതെങ്കിലും തരത്തിലുള്ള ഒരു കരാറിൽ ഏർപ്പെടാൻ നിയമപരമായി യാതൊരു അവകാശവുമില്ലെന്ന്. അതായത് ഒരു കരാറിന് പ്രായപൂർത്തിയാകാത്ത ഒരാൾ നൽകുന്ന സമ്മതം ആ കരാർ നിലവിൽ വരുന്ന സമയം മുതൽ തന്നെ നിയമപരമായി പൂർണ്ണമായും അസാധുവാണ്. നിയമം ഇത്രയും ലളിതവും വ്യക്തവുമായിരിക്കെ എങ്ങനെയാണ് ഈ വിദേശ പ്ലാറ്റ്‌ഫോമുകൾ നമ്മുടെ നാട്ടിലെ 13-ഉം 14-ഉം വയസ്സുള്ള കുട്ടികളുമായി കരാറിലേർപ്പെട്ട് അവർക്ക് അക്കൗണ്ടുകൾ നൽകുന്നത്? ഇത് രാജ്യത്തെ നിയമവ്യവസ്ഥയോടുള്ള വെല്ലുവിളിയാണ്. ഈ ഒരു നിയമപരമായ വിടവ് മുതലെടുത്താണ് കുട്ടികൾ അനായാസം അക്കൗണ്ടുകൾ തുറക്കുന്നതും അത് നിലനിർത്തുന്നതും. ഈ പഴുതടയ്ക്കാൻ കേന്ദ്ര സർക്കാർ അടിയന്തരമായി ഇടപെടണമെന്നും കുട്ടികൾ തുറന്ന ഇത്തരം അക്കൗണ്ടുകളെല്ലാം അസാധുവായി പ്രഖ്യാപിക്കണമെന്നുമാണ് ഹർജിക്കാർ കോടതിയിൽ ആവശ്യപ്പെട്ടിട്ടുള്ളത്.
കുട്ടികളെ ഇത്തരം ഡിജിറ്റൽ ഇടങ്ങളിൽ നിന്നും മാറ്റിനിർത്തണമെന്ന് നിയമം കർശനമായി പറയാനുള്ള ഉത്തരം തികച്ചും ഭയാനകമാണ്. ഹർജിക്കാർക്ക് വേണ്ടി ഹാജരായ സീനിയർ അഡ്വക്കേറ്റ് എച്ച്.എസ്. ഫൂൽക്ക കോടതിയിൽ ചൂണ്ടിക്കാണിച്ച കാര്യങ്ങൾ ഏതൊരു മാതാപിതാക്കളുടെയും നെഞ്ചുരുപ്പ് കൂട്ടുന്നതാണ്. കുട്ടികളെ ഇത്തരം ഡിജിറ്റൽ ലോകത്തേക്ക് യാതൊരു നിയന്ത്രണവുമില്ലാതെ തുറന്നുവിടുന്നത് സങ്കൽപ്പിക്കാൻ പോലും ആകാത്തത്ര വലിയ അപകടങ്ങളിലേക്കാണ് അവരെ നയിക്കുന്നത്. ഓൺലൈൻ ഗ്രൂമിംഗ്, കുട്ടികൾക്ക് നേരെ നടക്കുന്ന ലൈംഗിക ചൂഷണം, മനുഷ്യക്കടത്ത്, ബിഹേവിയറൽ പ്രൊഫൈലിംഗ്, വ്യക്തിഗത വിവരങ്ങളുടെ ദുരുപയോഗം, സൈബർ ഭീഷണിപ്പെടുത്തൽ കൂടാതെ പ്രായത്തിന് ഒട്ടും അനുയോജ്യമല്ലാത്ത ഉള്ളടക്കങ്ങൾ കാണാൻ ഇടവരൽ തുടങ്ങി കുട്ടികളുടെ സുരക്ഷയും അന്തസ്സും തകർക്കുന്ന അസംഖ്യം കെണികളാണ് ഈ പ്ലാറ്റ്‌ഫോമുകളിൽ ഒളിഞ്ഞിരിക്കുന്നത്. ഇവിടെ നിങ്ങളുടെ കുട്ടി കാണുന്ന ഓരോ റീൽസും അവർ ലൈക്ക് ചെയ്യുന്ന ഓരോ പോസ്റ്റും കൃത്യമായി ട്രാക്ക് ചെയ്യപ്പെടുന്നുണ്ട്. അവരുടെ മാനസികാവസ്ഥയും താല്പര്യങ്ങളും ദൗർബല്യങ്ങളും മനസ്സിലാക്കി അതനുസരിച്ചുള്ള ഉള്ളടക്കങ്ങൾ നൽകി അവരെ സ്ക്രീനുകൾക്ക് അടിമകളാക്കുകയാണ് ഈ ആപ്പുകളിലെ ആർട്ടിഫിഷ്യൽ ഇന്റലിജൻസ് ചെയ്യുന്നത്. മുതിർന്നവർക്ക് പോലും നിയന്ത്രിക്കാൻ കഴിയാത്ത ഈ അൽഗോരിതങ്ങളുടെ വലയിൽ വീഴുന്ന കുട്ടികളുടെ മാനസികാരോഗ്യം പൂർണ്ണമായും തകരുകയാണ്. വ്യാജ പ്രൊഫൈലുകൾക്ക് പിന്നിലിരുന്ന് കുട്ടികളെ വലയിലാക്കാൻ ശ്രമിക്കുന്ന സംഘങ്ങളെ തിരിച്ചറിയാനുള്ള പക്വത ആ പ്രായത്തിലുള്ള കുട്ടികൾക്കില്ല എന്നതാണ് ഇവിടുത്തെ ഏറ്റവും വലിയ അപകടം.
ഈ ഭയാനകമായ സാഹചര്യത്തിലാണ് സുപ്രീം കോടതിയുടെ ശക്തമായ ഇടപെടൽ ഉണ്ടാകുന്നത്. 2021-ലെ ഇൻഫർമേഷൻ ടെക്നോളജി റൂൾസ് പ്രകാരം സോഫ്റ്റ്‌വെയറുകളിൽ മാറ്റം വരുത്തി അംഗത്വത്തിനുള്ള കുറഞ്ഞ പ്രായം 18 വയസ്സായി നിശ്ചയിക്കാൻ പ്ലാറ്റ്‌ഫോമുകളോട് കർശനമായി നിർദ്ദേശിക്കാൻ കോടതി കേന്ദ്ര സർക്കാരിനോട് ആവശ്യപ്പെട്ടിട്ടുണ്ട്. കേന്ദ്ര സർക്കാരിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത, 2023-ലെ ഡിജിറ്റൽ പേഴ്‌സണൽ ഡാറ്റ പ്രൊട്ടക്ഷൻ (DPDP) ആക്ട് നിലവിലുണ്ടെന്നും കുട്ടികളുടെ വിവരങ്ങൾ കൈകാര്യം ചെയ്യുന്നതിന് രക്ഷിതാവിന്റെ കൃത്യമായ സമ്മതം ആവശ്യമാണെന്നും വ്യക്തമാക്കുകയുണ്ടായി. വെറുമൊരു മാർഗ്ഗനിർദ്ദേശം പുറപ്പെടുവിക്കുന്നതിന് പകരം കൃത്യമായ പ്രായ പരിശോധനയും ഐഡന്റിറ്റി വെരിഫിക്കേഷനും കൊണ്ടുവരുകയാണ് ഇനി ചെയ്യേണ്ടത്.
ഈ നിയമം കർശനമാകുന്നതോടെ ഇനി വെറുതെ ഒരു തെറ്റായ ജനനതീയതി അടിച്ചുകൊടുത്ത് ഒരു കുട്ടിക്കും അക്കൗണ്ട് തുറക്കാൻ കഴിയില്ല. പകരം ആർട്ടിഫിഷ്യൽ ഇന്റലിജൻസിന്റെ സഹായത്തോടെയുള്ള ഏജ് വെരിഫിക്കേഷൻ അല്ലെങ്കിൽ സർക്കാർ രേഖകളുടെ അടിസ്ഥാനത്തിലുള്ള പരിശോധന നിർബന്ധമാക്കും. ഒപ്പം, ഒരു കുട്ടി അക്കൗണ്ട് തുറക്കാൻ ശ്രമിക്കുമ്പോൾ മാതാപിതാക്കളുടെ ഫോണിലേക്ക് അനുമതിക്കായുള്ള നോട്ടിഫിക്കേഷൻ വരികയും മാതാപിതാക്കൾ പൂർണ്ണസമ്മതം നൽകിയാൽ മാത്രം അക്കൗണ്ട് ആക്ടീവ് ആവുകയും ചെയ്യുന്ന പാരന്റൽ കൺട്രോൾ സംവിധാനങ്ങളും നിലവിൽ വരും. അമേരിക്കയിലും ചില യൂറോപ്യൻ രാജ്യങ്ങളിലും നിലവിൽ വന്ന ഇത്തരം കടുത്ത നിയന്ത്രണങ്ങളിലേക്ക് ഇന്ത്യ കൂടി കടക്കുമ്പോൾ അത് വിദേശ ടെക് കമ്പനികളുടെ ആഗോള ബിസിനസിനെത്തന്നെ ബാധിച്ചേക്കാം. എങ്കിലും വരും നാളുകളിൽ 18 വയസ്സിൽ താഴെയുള്ള ലക്ഷക്കണക്കിന് വ്യാജ അക്കൗണ്ടുകൾ ഇല്ലാതാകുമെന്നത് ഉറപ്പാണ്.