പാകിസ്ഥാനിലെ പെഷവാറിലുള്ള സ്വകാര്യ സ്കൂളിന്റെ മേൽക്കൂര തകർന്നുവീണ് 34 വിദ്യാർഥികളടക്കം 35 പേർ മരിച്ചു. ദിർ കോളനിയിലെ അൽ ഖൈർ സ്കൂളിലാണ് കഴിഞ്ഞ ദിവസം അപകടമുണ്ടായത്. ഒരു അധ്യാപകനും ജീവൻ നഷ്ടമായി. അപകടസമയത്ത് കെട്ടിടത്തിന്റെ മുകളിലത്തെ നിലയിൽ 30 വിദ്യാർഥികളുണ്ടായിരുന്നു. സംഭവത്തിന് പിന്നാലെ സ്കൂൾ ഉടമയെ പൊലീസ് അറസ്റ്റ് ചെയ്തു.
മൂന്ന് നിലകളുള്ള കെട്ടിടത്തിന്റെ നിർമാണത്തിലെ അപാകതയാണ് അപകടത്തിന് കാരണമെന്നാണ് ഉദ്യോഗസ്ഥർ പറയുന്നത്. നിരവധി വിദ്യാർഥികൾക്ക് പരുക്കേറ്റു. തലയ്ക്ക് ഗുരുതരമായി പരുക്കേറ്റ മൂന്ന് വിദ്യാർഥികൾ ചികിത്സയിലാണ്. നിസ്സാരമായി പരുക്കേറ്റ ഇരുപതോളം കുട്ടികൾക്ക് പ്രാഥമിക ചികിത്സ നൽകിയശേഷം വിട്ടയച്ചു. കെട്ടിടാവശിഷ്ടങ്ങൾക്കിടയിൽ കുടുങ്ങിയ എല്ലാവരെയും രക്ഷപ്പെടുത്തിയതായി പെഷവാർ ഡെപ്യൂട്ടി കമ്മിഷണർ അഫാഖ് വസീർ അറിയിച്ചു. കെട്ടിടനിർമാണ ചട്ടങ്ങൾ ലംഘിച്ചാണ് സ്കൂൾ നിർമിച്ചതെന്ന സംശയത്തിൽ അന്വേഷണത്തിനും ഉത്തരവിട്ടിട്ടുണ്ട്. പാക് സൈന്യവും രക്ഷാപ്രവർത്തനത്തിൽ പങ്കെടുത്തു. അപകടത്തിൽ പ്രസിഡന്റ് ആസിഫ് അലി സർദാരിയും പ്രധാനമന്ത്രി ഷെഹ്ബാസ് ഷെരീഫും ദുഃഖം രേഖപ്പെടുത്തി.പാകിസ്ഥാനിൽ സ്കൂൾ കെട്ടിടങ്ങൾ തകർന്നുവീഴുന്ന അപകടങ്ങൾ ആവർത്തിക്കുന്നത് ആശങ്കയുണ്ടാക്കുന്നുണ്ട്. കഴിഞ്ഞ ജൂലൈയിൽ സിന്ധ് പ്രവിശ്യയിലെ സർക്കാർ പ്രൈമറി സ്കൂളിന്റെ ഭിത്തി തകർന്നുവീണ് മൂന്ന് പെൺകുട്ടികൾ മരിച്ചിരുന്നു. അതേ മാസം ലാഹോറിൽ സ്കൂൾ കെട്ടിടം തകർന്ന് ഒരു കുട്ടിയും മരിച്ചു. ജൂണിൽ ലാഹോറിലെ സ്വകാര്യ ട്യൂഷൻ സെന്ററിന്റെ മേൽക്കൂര തകർന്നുവീണ് 14 കുട്ടികൾക്കാണ് ജീവൻ നഷ്ടമായത്.
നിലവാരമില്ലാത്ത നിർമാണസാമഗ്രികളുടെ ഉപയോഗമാണ് ഇത്തരം അപകടങ്ങൾക്ക് കാരണമാകുന്നതെന്നാണ് റിപ്പോർട്ടുകൾ. പെഷവാറിലെ ദുരന്തത്തിനു പിന്നാലെ കെട്ടിടനിർമാണ ചട്ടങ്ങൾ പാലിച്ചിട്ടുണ്ടോയെന്നും സുരക്ഷാ മാനദണ്ഡങ്ങൾ ഉറപ്പാക്കിയിരുന്നോയെന്നും സംബന്ധിച്ച അന്വേഷണം നിർണായകമാകും.
