സുഭാഷ് കെ. രാജ് സംവിധാനത്തിൽ ആക്ഷൻ കിംഗ് അർജുൻ സർജ തകർത്തഭിനയിച്ച പുതിയ ചിത്രം ‘ബ്ലാസ്റ്റ്’ തിയേറ്ററുകളിൽ വലിയ തരംഗം സൃഷ്ടിച്ചതിന് പിന്നാലെ ഒ.ടി.ടി റിലീസിന് ഒരുങ്ങുന്നു. മെയ് 28-ന് ആഗോള റിലീസായെത്തിയ ചിത്രം ബോക്സ് ഓഫീസിൽ മികച്ച നേട്ടമാണ് കൊയ്തത്. ഇപ്പോഴിതാ ചിത്രത്തിന്റെ ഡിജിറ്റൽ സ്ട്രീമിംഗ് അവകാശങ്ങൾ പ്രമുഖ ഒ.ടി.ടി ഭീമന്മാരായ നെറ്റ്ഫ്ലിക്സ് സ്വന്തമാക്കിയതായാണ് റിപ്പോർട്ടുകൾ പുറത്തുവരുന്നത്. റിലീസ് തീയതി സംബന്ധിച്ച ഔദ്യോഗിക പ്രഖ്യാപനം അണിയറപ്രവർത്തകർ ഉടൻ തന്നെ പുറത്തുവിടുമെന്നാണ് സൂചന.
കേവലം 18 കോടി രൂപയുടെ ചെറിയ ബഡ്ജറ്റിൽ ഒരുങ്ങിയ ‘ബ്ലാസ്റ്റ്’, തിയേറ്ററുകളിൽ നിന്ന് വലിയ ലാഭമാണ് നിർമ്മാതാക്കൾക്ക് നേടിക്കൊടുത്തത്. ഒരു കരാട്ടെ മാസ്റ്ററും അയാളുടെ കുടുംബവും, അവരുടെ ജീവിതത്തിലേക്ക് ക്ഷണിക്കപ്പെടാതെ കടന്നുവരുന്ന ചില വ്യക്തികളും തുടർന്നുണ്ടാകുന്ന നാടകീയവും ആക്ഷൻ നിറഞ്ഞതുമായ സംഭവവികാസങ്ങളുമാണ് സിനിമയുടെ പ്രധാന പ്രമേയം. അർജുൻ സർജയുടെ ആക്ഷൻ പ്രകടനങ്ങൾക്കൊപ്പം നായികമാരായ പ്രീതി മുകുന്ദൻ, അഭിരാമി എന്നിവരുടെ മികച്ച പ്രകടനവും ചിത്രത്തിന്റെ വലിയ വിജയത്തിന് കാരണമായി പ്രേക്ഷകർ വിലയിരുത്തുന്നു.
‘കെ.ജി.എഫ്’, ‘സലാർ’ എന്നീ ചിത്രങ്ങളിലൂടെ പ്രശസ്തനായ രവി ബസ്രൂർ ആണ് ബ്ലാസ്റ്റിനായി പശ്ചാത്തല സംഗീതവും പാട്ടുകളും ഒരുക്കിയിരിക്കുന്നത്. പ്രശസ്ത നിർമ്മാണ കമ്പനിയായ എ.ജി.എസ് എന്റർടൈൻമെന്റ് നിർമ്മിച്ച ഈ ചിത്രത്തിൽ വലിയൊരു താരനിര തന്നെയുണ്ട്. അർജുൻ ചിദംബരം, ദിലീപൻ, ബാല ഹസൻ, ജോൺ കോക്കൻ, രമേശ് നാരായണൻ, പവൻ, വിവേക് പ്രസന്ന, വിനോദ് സാഗർ എന്നിവരാണ് ചിത്രത്തിലെ മറ്റ് പ്രധാന കഥാപാത്രങ്ങളെ അവതരിപ്പിച്ചത്. അരുൺ രാധാകൃഷ്ണൻ ഛായാഗ്രഹണം നിർവ്വഹിച്ച ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത് പ്രദീപ് രാഘവാണ്.
