പ്രശസ്ത തീർത്ഥാടന കേന്ദ്രമായ ശബരിമലയിൽ പൂജകളുടെ മറവിൽ കോടികളുടെ വൻ സാമ്പത്തിക ക്രമക്കേട് നടന്നതായി ദേവസ്വം വിജിലൻസിന്റെ ഞെട്ടിക്കുന്ന കണ്ടെത്തൽ. കഴിഞ്ഞ പത്തു വർഷത്തിലേറെയായി സന്നിധാനത്ത് തുടരുന്ന ഈ വൻ കൊള്ളയ്ക്ക് പിന്നിൽ അതത് കാലങ്ങളിൽ സേവനമനുഷ്ഠിച്ച ചില അഡ്മിനിസ്ട്രേറ്റീവ് ഓഫീസർമാരാണെന്ന് വിജിലൻസ് റിപ്പോർട്ട് വ്യക്തമാക്കുന്നു. മുൻപ് വിവാദമായ സ്വർണക്കൊള്ള കേസിൽ ഉൾപ്പെട്ട ഉദ്യോഗസ്ഥർ ഈ പദവികളിൽ ഇരുന്ന കാലയളവിലും സമാനമായ തട്ടിപ്പുകൾ തടസ്സമില്ലാതെ നടന്നിരുന്നു എന്നാണ് പുറത്തുവരുന്ന വിവരങ്ങൾ. ക്രമക്കേടിലൂടെ എത്ര കോടി രൂപയുടെ നഷ്ടം ദേവസ്വം ബോർഡിന് ഉണ്ടായിട്ടുണ്ടെന്ന് കൃത്യമായി തിട്ടപ്പെടുത്താൻ സംസ്ഥാന ഓഡിറ്റ് വകുപ്പിന്റെ അടിയന്തര സഹായം തേടിയിരിക്കുകയാണ് വിജിലൻസ്. ശബരിമല സ്പെഷ്യൽ കമ്മിഷണർ ഹൈക്കോടതിക്ക് സമർപ്പിച്ച റിപ്പോർട്ടിലും ഈ വിഷയത്തിൽ സംസ്ഥാന ഓഡിറ്റ് വിഭാഗത്തിന്റെ വിശദമായ പരിശോധന വേണമെന്ന് ആവശ്യപ്പെട്ടിട്ടുണ്ട്.
ഹൈക്കോടതിയുടെ കർശന വിലക്കുള്ള ഒരു വ്യക്തിയുടെ സൗജന്യ സേവനങ്ങളെ മറയാക്കിയാണ് സന്നിധാനത്ത് ഈ അഴിമതി നാടകം അരങ്ങേറിയത്. ശബരിമലയിലെ അനധികൃത ഇടപെടലുകളുടെയും സ്വാധീനത്തിന്റെയും പേരിൽ മൂന്ന് വർഷം മുൻപ് ഹൈക്കോടതി വിലക്കേർപ്പെടുത്തിയ കൊല്ലം സ്വദേശിയായ വ്യവസായി സുനിൽ കുമാർ ആണ് കഴിഞ്ഞ ഒരു പതിറ്റാണ്ടായി നിത്യപൂജയ്ക്കുള്ള സാധനങ്ങൾ ഇവിടെ വാങ്ങി നൽകിയിരുന്നത്. മാസപൂജകൾക്കും മണ്ഡല-മകരവിളക്ക് ഉത്സവത്തിനുമായി അരി, അവൽ, ശർക്കര, പഴം, കൊട്ടത്തേങ്ങ, പച്ചത്തേങ്ങ, ചുക്ക്, ജീരകം, ഏലയ്ക്ക, മഞ്ഞൾ, കുരുമുളക്, പട്ട്, തോർത്ത് തുടങ്ങി ഏകദേശം 54 ലക്ഷം രൂപയോളം വിലമതിക്കുന്ന സാധനങ്ങളാണ് ഇദ്ദേഹം സൗജന്യമായി സന്നിധാനത്ത് എത്തിച്ചിരുന്നത്. എന്നാൽ കോടതി ഉത്തരവുകളെ കാറ്റിൽപ്പറത്തിക്കൊണ്ട് ഈ വ്യക്തിയിൽ നിന്ന് സാധനങ്ങൾ കൈപ്പറ്റുന്നത് ഉദ്യോഗസ്ഥർ തുടരുകയായിരുന്നു.ഇങ്ങനെ ഭക്തൻ സൗജന്യമായി നൽകുന്ന വൻതോതിലുള്ള സാധനങ്ങൾ ശബരിമലയിലെ ഔദ്യോഗിക സ്റ്റോറിലെ അക്കൗണ്ടിലേക്ക് രേഖപ്പെടുത്താറില്ലായിരുന്നു എന്നതാണ് തട്ടിപ്പിന്റെ പ്രധാന വഴി. സന്നിധാനത്തെ അഡ്മിനിസ്ട്രേറ്റീവ് ഓഫീസറുടെ മുറിയോട് ചേർന്നുള്ള പ്രത്യേക കേന്ദ്രത്തിലാണ് ഇവ സൂക്ഷിച്ചിരുന്നത്. ഈ സാധനങ്ങളുടെ ഗുണനിലവാരം പരിശോധിക്കാൻ യാതൊരു സംവിധാനവും ഏർപ്പെടുത്തിയിരുന്നതുമില്ല. ഗണപതി ഹോമം ഉൾപ്പെടെയുള്ള നിത്യപൂജകൾക്ക് ഈ സൗജന്യ സാധനങ്ങൾ ഉപയോഗിച്ച ശേഷം, ഇവ ദേവസ്വം പണം കൊടുത്ത് വാങ്ങിയതാണെന്ന വ്യാജേന വലിയ തുകകൾ അഡ്മിനിസ്ട്രേറ്റീവ് ഓഫീസർമാർ സ്വന്തം പേരിൽ എഴുതിയെടുക്കുകയായിരുന്നു. നിത്യപൂജകൾക്ക് പുറമെ ലക്ഷങ്ങൾ ചിലവ് വരുന്ന സഹസ്രകലശം, പടിപൂജ, കളഭാഭിഷേകം, ഉദയാസ്തമയപൂജ തുടങ്ങിയ പ്രത്യേക വഴിപാടുകൾക്കും ഇത്തരത്തിൽ വ്യാജ ബില്ലുകൾ ചമച്ച് പണം തട്ടിയെടുത്തതായി വിജിലൻസ് അന്വേഷണത്തിൽ വ്യക്തമായിട്ടുണ്ട്.
സന്നിധാനത്തെ പ്രധാന വഴിപാടുകളിലൊന്നായ അഷ്ടാഭിഷേകത്തിന്റെ തുകയും ഉദ്യോഗസ്ഥരുടെ കീശയിലേക്കാണ് പോയത്. അഷ്ടാഭിഷേകം നടത്തുന്നതിനായി ഭക്തരിൽ നിന്ന് 6000 രൂപയാണ് ദേവസ്വം ബോർഡ് ഈടാക്കുന്നത്. ഇതിൽ അഭിഷേകത്തിന് ആവശ്യമായ 5700 രൂപയുടെ സാധനങ്ങൾ, നേരത്തെ പറഞ്ഞതുപോലെ സന്നിധാനത്ത് സൗജന്യമായി ലഭിച്ച സ്റ്റോക്കിൽ നിന്നാണ് എടുത്തിരുന്നത്. ബാക്കി വരുന്ന 300 രൂപ പാൽ, കരിക്ക്, പനിനീർ എന്നിവ വാങ്ങിയെന്ന വ്യാജേന അഡ്മിനിസ്ട്രേറ്റീവ് ഓഫീസർമാർ മാറിയെടുക്കുകയും ചെയ്തു. മണ്ഡലകാലത്ത് അഷ്ടാഭിഷേകങ്ങളുടെ എണ്ണം പ്രതിദിനം 50 ആയി നിജപ്പെടുത്തിയിട്ടുണ്ടെങ്കിലും, മാസപൂജകളിൽ ഇത് 400 വരെയായി ഉയരാറുണ്ട്. ഭക്തർ ഭക്തിപൂർവ്വം സമർപ്പിക്കുന്ന തുകയും വഴിപാട് സാധനങ്ങളും ദുരുപയോഗം ചെയ്ത് ഉദ്യോഗസ്ഥർ നടത്തിയ ഈ വൻ കൊള്ള ഭക്തജനങ്ങളിലും പൊതുസമൂഹത്തിലും വലിയ പ്രതിഷേധത്തിന് കാരണമായിട്ടുണ്ട്.
