റഷ്യയിലെ ഒരു ലബോറട്ടറി ജീവനക്കാരിയുടെ മരണത്തിന് പിന്നാലെ പ്ലേഗ് ബാധ സംശയം ഉയർന്നതോടെ സംഭവം രാജ്യാന്തര ശ്രദ്ധയിൽ. വിഷയത്തിൽ റഷ്യൻ പ്രസിഡന്റ് വ്ലാദിമിർ പുടിനുമായി ഉടൻ സംസാരിക്കുമെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. സംഭവത്തെക്കുറിച്ച് കൂടുതൽ വിവരങ്ങൾ പുറത്തുവിടണമെന്ന് ലോകാരോഗ്യ സംഘടനയും റഷ്യയോട് ആവശ്യപ്പെട്ടു. അതേസമയം, റഷ്യൻ അധികൃതർ പ്ലേഗ് സ്ഥിരീകരിച്ചെന്ന റിപ്പോർട്ടുകൾ നിഷേധിക്കുകയും പ്രത്യേക പ്രതിരോധ നടപടികൾ ഏർപ്പെടുത്തിയെന്ന പ്രചാരണം തള്ളുകയും ചെയ്തു.
ഇർകുട്സ്കിലെ ആന്റി-പ്ലേഗ് ഇൻസ്റ്റിറ്റ്യൂട്ടിലെ 28കാരിയായ ലബോറട്ടറി ജീവനക്കാരി ദാര്യ ഷിപിലോവയുടെ മരണമാണ് ആശങ്കയ്ക്ക് കാരണം. ടെസ്റ്റ് ട്യൂബ് പൊട്ടിയതിനെ തുടർന്ന് ന്യൂമോണിക് പ്ലേഗ് ബാധിച്ചിരിക്കാമെന്ന് റഷ്യൻ മാധ്യമമായ പീപ്പിൾ ഓഫ് ബൈക്കൽ റിപ്പോർട്ട് ചെയ്തിരുന്നു. ലബോറട്ടറി അപകടവുമായി ബന്ധപ്പെട്ടാകാം മരണമെന്ന റിപ്പോർട്ടുകളും പുറത്തുവന്നു. ഷിപിലോവയുമായി സമ്പർക്കത്തിലുണ്ടായിരുന്ന 200ഓളം പേരെ ക്വാറന്റൈനിൽ പ്രവേശിപ്പിച്ചതായും റിപ്പോർട്ടുണ്ടായിരുന്നു. എന്നാൽ പ്ലേഗാണ് മരണകാരണമെന്ന് സ്ഥിരീകരിച്ചിട്ടില്ലെന്ന് റഷ്യൻ അധികൃതർ വ്യക്തമാക്കി. പോസ്റ്റ്മോർട്ടം പരിശോധനയിൽ പ്ലേഗ് കണ്ടെത്തിയില്ലെന്നും ആരോഗ്യ നിരീക്ഷണ ഏജൻസിയായ റോസ്പോട്രെബ്നാഡ്സോർ അറിയിച്ചു. ഇർകുട്സ്ക് ഗവർണർ ഇഗോർ കോബ്സെവ്, ഷിപിലോവയുടെ മരണകാരണം ന്യൂമോണിയയാണെന്ന് പരിശോധനയിൽ കണ്ടെത്തിയെങ്കിലും കൃത്യമായ കാരണം ഇപ്പോഴും നിർണയിച്ചിട്ടില്ലെന്നും വ്യക്തമാക്കി. അവരുടെ ജൈവസാമ്പിളുകളിൽ ജോലിയുമായി ബന്ധപ്പെട്ട അപകടകാരികളായ സൂക്ഷ്മജീവികളൊന്നും കണ്ടെത്തിയില്ലെന്നും മറ്റ് ജീവനക്കാരാരും ചികിത്സ തേടിയിട്ടില്ലെന്നും അദ്ദേഹം പറഞ്ഞു.സംഭവത്തിൽ കൂടുതൽ വിവരങ്ങൾ റഷ്യ പുറത്തുവിടണമെന്ന് അമേരിക്ക ആവശ്യപ്പെട്ടു. അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ, സാഹചര്യം വിലയിരുത്താനും ആവശ്യമായ നടപടികൾ സ്വീകരിക്കാനും മറ്റ് രാജ്യങ്ങൾക്ക് കഴിയുന്ന തരത്തിൽ റഷ്യ സുതാര്യത പാലിക്കണമെന്നും കൂടുതൽ വിവരങ്ങൾ പങ്കുവയ്ക്കണമെന്നും ആവശ്യപ്പെട്ടു. റഷ്യയിൽനിന്ന് ലഭിച്ച വിവരങ്ങളുടെ അടിസ്ഥാനത്തിൽ ഇർകുട്സ്ക് നഗരത്തിൽ പ്ലേഗ് ബാധ സ്ഥിരീകരിച്ചിട്ടില്ലെന്ന് ലോകാരോഗ്യ സംഘടനയും വ്യക്തമാക്കി. ഇൻസ്റ്റിറ്റ്യൂട്ടിലെ ജീവനക്കാരിയുമായി ബന്ധപ്പെട്ട സമൂഹത്തിൽനിന്ന് ഉണ്ടായ ന്യൂമോണിയ കേസിനെക്കുറിച്ച് റഷ്യ എപ്പിഡെമിയോളജിക്കൽ അന്വേഷണം ആരംഭിച്ചതായും സമ്പർക്കത്തിലുണ്ടായവരെ കണ്ടെത്തി വൈദ്യപരിശോധനയും ലബോറട്ടറി പരിശോധനയും നടത്തിവരുന്നതായും സംഘടന അറിയിച്ചു. ഇതുവരെ പരിശോധിച്ച സമ്പർക്കപ്പട്ടികയിലുള്ളവരിൽ അപകടകരമായ സാംക്രമിക രോഗങ്ങളുടെ രോഗാണുക്കളൊന്നും കണ്ടെത്തിയിട്ടില്ലെന്നും ഇർകുട്സ്കിലെ നിലവിലെ അപകടസാധ്യത മിതമായതിൽനിന്ന് താഴ്ന്നതാണെന്നും ലോകാരോഗ്യ സംഘടന വ്യക്തമാക്കി.
പ്ലേഗിന്റെ ഏറ്റവും പകർച്ചശേഷിയുള്ള രൂപമാണ് ന്യൂമോണിക് പ്ലേഗ്. ശ്വാസകോശത്തെ ഗുരുതരമായി ബാധിക്കുന്ന ഈ രോഗം ശ്വാസകോശത്തിലൂടെ പകരാം. നേരത്തെ ചികിത്സ ലഭിച്ചില്ലെങ്കിൽ രോഗം മരണകാരണമാകാനും സാധ്യതയുണ്ട്. ആവശ്യമായാൽ റഷ്യയെ സഹായിക്കാൻ അമേരിക്ക തയ്യാറാണെന്ന് ട്രംപ് നേരത്തെ വ്യക്തമാക്കിയിരുന്നു. ഇതിന് പിന്നാലെ അമേരിക്കയിലെ പകർച്ചവ്യാധി സാഹചര്യം ചൂണ്ടിക്കാട്ടി റഷ്യയും അമേരിക്കയെ സഹായിക്കാൻ തയ്യാറാണെന്ന് അറിയിച്ചു. അമേരിക്കയിലെ മൂന്ന് സംസ്ഥാനങ്ങളിൽ ചാമപ്പനി സാഹചര്യം രൂക്ഷമായെന്നും ജൂണിൽ ന്യൂ മെക്സിക്കോയിൽ പ്ലേഗ് ബാധിച്ച് മരണം റിപ്പോർട്ട് ചെയ്തതായും റഷ്യൻ ആരോഗ്യ നിരീക്ഷണ ഏജൻസി ചൂണ്ടിക്കാട്ടി. അതേസമയം, പ്ലേഗും മറ്റ് പകർച്ചവ്യാധികളും സംബന്ധിച്ച അന്താരാഷ്ട്ര സമ്മേളനം ഒക്ടോബർ 21, 22 തീയതികളിൽ ഇർകുട്സ്കിൽ നടക്കാനിരിക്കുകയാണ്. ഈ സമ്മേളനത്തിന് ജീവനക്കാരിയുടെ മരണവുമായി ബന്ധമില്ലെന്ന് സംഘാടകർ വ്യക്തമാക്കി. നിലവിൽ പ്ലേഗ് സ്ഥിരീകരിച്ചിട്ടില്ലെങ്കിലും റഷ്യയിലെ സംഭവത്തിൽ അമേരിക്കയും ലോകാരോഗ്യ സംഘടനയും കൂടുതൽ വിവരങ്ങൾ തേടുന്നത് സാഹചര്യം സൂക്ഷ്മമായി നിരീക്ഷിക്കേണ്ടതിന്റെ ആവശ്യകതയാണ് വ്യക്തമാക്കുന്നത്.
