സംസ്ഥാനത്തെ മരുന്ന് ക്ഷാമവുമായി ബന്ധപ്പെട്ട് നിയമസഭയിൽ ആരോഗ്യമന്ത്രി കെ. മുരളീധരന്റെ വാദങ്ങൾക്ക് ശക്തമായ മറുപടിയുമായി പ്രതിപക്ഷ നേതാവ് പിണറായി വിജയൻ. സംസ്ഥാനത്ത് മരുന്ന് ക്ഷാമമില്ലെന്നും ചില മരുന്നുകൾക്ക് മാത്രമാണ് കുറവുള്ളതെന്നുമുള്ള മന്ത്രിയുടെ ന്യായീകരണത്തെ പരിഹസിച്ച പിണറായി, “ആ കുറവ് തന്നെയാണ് ക്ഷാമമെന്ന് മന്ത്രി മനസ്സിലാക്കണം” എന്ന് തുറന്നടിച്ചു.
ആരോഗ്യരംഗത്തെ പ്രശ്നങ്ങൾ പരിഹരിക്കാൻ തങ്ങളുടെ കയ്യിൽ അലാവുദ്ദീന്റെ അത്ഭുതവിളക്കൊന്നും ഇല്ലെന്ന മന്ത്രിയുടെ പരാമർശത്തിനും അദ്ദേഹം ചുട്ട മറുപടി നൽകി. “കേരളത്തിന്റെ ആരോഗ്യരംഗം രാജ്യത്തിന്റെ തന്നെ പ്രകാശഗോപുരമാണ്. ആ വിളക്ക് കെടുത്താതിരുന്നാൽ മാത്രം മതി, വേറെ അത്ഭുതവിളക്കൊന്നും തേടിപ്പോകേണ്ട കാര്യമില്ല,” പിണറായി വിജയൻ വ്യക്തമാക്കി. സർക്കാരിന്റെ പിടിപ്പുകേടാണ് യഥാർത്ഥ പ്രശ്നങ്ങൾക്ക് കാരണമെന്നും മരുന്നുകിട്ടാതെ ജനങ്ങൾ മണിക്കൂറുകളോളം ക്യൂ നിൽക്കുന്ന ദൃശ്യങ്ങളാണ് മാധ്യമങ്ങളിൽ കാണുന്നതെന്നും അദ്ദേഹം കൂട്ടിച്ചേർത്തു. അട്ടപ്പാടിയിൽ ഉൾപ്പെടെ ശിശുമരണങ്ങൾ റിപ്പോർട്ട് ചെയ്യപ്പെടുന്ന സാഹചര്യത്തിൽ ഇതിന് ആര് ഉത്തരവാദിയെന്ന് സർക്കാർ ആലോചിക്കണമെന്നും അദ്ദേഹം ആവശ്യപ്പെട്ടു.ആരോഗ്യമേഖലയിലെ കടുത്ത പ്രതിസന്ധിയും മരുന്ന് ക്ഷാമവും ചൂണ്ടിക്കാട്ടി പ്രതിപക്ഷം കൊണ്ടുവന്ന അടിയന്തര പ്രമേയ നോട്ടീസിനിടെയാണ് സഭയിൽ ഭരണ-പ്രതിപക്ഷ വാക്പോര് അരങ്ങേറിയത്. സംസ്ഥാനത്ത് ജീവൻരക്ഷാ മരുന്നുകൾ അടക്കം ലഭ്യമല്ലെന്ന് കെ.വി. സുമേഷ് എം.എൽ.എ ചൂണ്ടിക്കാണിച്ചിരുന്നു. എന്നാൽ, അധികാരം നഷ്ടപ്പെട്ട സങ്കടത്തിനുള്ള രോഗത്തിന്റെ മരുന്നൊഴികെ മറ്റെല്ലാ മരുന്നുകളും സ്റ്റോക്കുണ്ടെന്നായിരുന്നു ആരോഗ്യമന്ത്രി കെ. മുരളീധരന്റെ പരിഹാസ രൂപത്തിലുള്ള മറുപടി. മുൻ സർക്കാർ സമയത്ത് പർച്ചേസ് ഓർഡർ നൽകാത്തതാണ് ഇപ്പോഴത്തെ പ്രതിസന്ധിക്ക് കാരണമെന്നും മന്ത്രി കുറ്റപ്പെടുത്തിയിരുന്നു.
