സ്വർണ്ണ വ്യാപാര രംഗത്ത് വലിയൊരു മാറ്റത്തിന് വഴിയൊരുക്കിക്കൊണ്ട്, സ്വർണ്ണാഭരണങ്ങൾ എളുപ്പത്തിൽ വിൽക്കാൻ സഹായിക്കുന്ന ‘സ്മാർട്ട് ഗോൾഡ് എടിഎം’ ചൈനയിലെ ഷാങ്ഹായിൽ അവതരിപ്പിച്ച വാർത്ത പുറത്തുവന്നിരുന്നു. ഒരു മാളിൽ സ്ഥാപിച്ചിട്ടുള്ള ഈ മെഷീൻ വഴി ആളുകൾക്ക് അവരുടെ സ്വർണ്ണാഭരണങ്ങൾ വെറും 30 മിനിറ്റിനുള്ളിൽ വിറ്റ് പണമാക്കാൻ സാധിക്കും. യാതൊരു രേഖകളോ പേപ്പർ വർക്കുകളോ ഇല്ലാതെ സ്വർണ്ണത്തിനുള്ള തുക അപ്പോൾത്തന്നെ ബാങ്ക് അക്കൗണ്ടിൽ ലഭിക്കുമെന്നതാണ് പ്രധാന ആകർഷണം.
ചൈനയിലെ കിംഗ്ഹുഡ് ഗ്രൂപ്പ് വികസിപ്പിച്ചെടുത്ത ഈ അത്യാധുനിക എടിഎം, സ്വർണ്ണ ഇനങ്ങൾ സ്വയം വിശകലനം ചെയ്യാനും ഉരുക്കാനും തൂക്കിനോക്കാനും രൂപകൽപ്പന ചെയ്തിട്ടുള്ളതാണ്. മെഷീനിൽ വെക്കുന്ന സ്വർണ്ണ ഇനത്തിന്റെ പരിശുദ്ധി കൃത്യമായി നിർണ്ണയിക്കുകയും, അതിനനുസരിച്ചുള്ള തുക വിൽപ്പനക്കാരന്റെ ബാങ്ക് അക്കൗണ്ടിലേക്ക് നേരിട്ട് കൈമാറുകയും ചെയ്യും. ഈ മെഷീൻ വഴി സ്വർണ്ണം വിൽക്കാൻ, സ്വർണ്ണ ഇനത്തിന് മൂന്ന് ഗ്രാമിൽ കൂടുതൽ ഭാരവും കുറഞ്ഞത് 50% ശുദ്ധിയും ഉണ്ടായിരിക്കണം.
