ദുബായിൽ കമ്പനി തുടങ്ങാനുള്ള നീക്കം, നാട്ടിൽ കൈമാറിയ പണത്തിന്റെ കണക്കുകൾ, അതുമായി ബന്ധപ്പെട്ട വാട്സാപ്പ് സന്ദേശങ്ങൾ—ടി. വീണക്കെതിരായ ഹവാല ഇടപാട് ആരോപണത്തിൽ പുതിയ വിവരങ്ങളാണ് ഇ.ഡി. റിപ്പോർട്ടിലൂടെ പുറത്തുവരുന്നത്. സംസ്ഥാന പോലീസ് മേധാവിക്ക് നൽകിയ റിപ്പോർട്ടിൽ വാട്സാപ്പ് സന്ദേശങ്ങളും ചുവന്ന പുറംചട്ടയുള്ള ‘റെഡ് ബുക്ക്’ ഡയറിയിലെ വിവരങ്ങളും ചില ബാങ്ക് ഇടപാടുകളുടെ രേഖകളും തെളിവുകളായി ഉൾപ്പെടുത്തിയിട്ടുണ്ടെന്നാണ് റിപ്പോർട്ട്.
നാട്ടിൽ ആരെ എത്ര രൂപ വീതം ഏൽപ്പിച്ചുവെന്ന വിവരങ്ങൾ വീണ റെഡ് ബുക്കിൽ രേഖപ്പെടുത്തിയിരുന്നുവെന്നും ഈ പണം വിദേശത്ത് കൈമാറ്റം ചെയ്തതുമായി ബന്ധപ്പെട്ട വിവരങ്ങൾ ഡയറിയിലുണ്ടെന്നും ഇ.ഡി. പറയുന്നു. ഇടപാടുകളെ സാധൂകരിക്കുന്ന വാട്സാപ്പ് സന്ദേശങ്ങളും ലഭിച്ചതായാണ് റിപ്പോർട്ടിലെ പരാമർശം. മുഹമ്മദ് റിയാസ് മന്ത്രിയായിരുന്ന സമയത്താണ് ഇടപാടുകൾ നടന്നതെന്നും റിയാസിന്റെ സുഹൃത്തുക്കൾ വഴിയാണ് ഇടപാടുകൾ നടത്തിയതെന്നതിന് തെളിവുണ്ടെന്നും ഇ.ഡി. റിപ്പോർട്ടിൽ പറയുന്നതായി നൽകിയ വിവരങ്ങളിൽ വ്യക്തമാക്കുന്നു.ദുബായിൽ താമസിച്ച് അവിടെ ഒരു കമ്പനി തുടങ്ങാൻ വീണ ശ്രമിച്ചെന്നും റിപ്പോർട്ടിലുണ്ട്. നാട്ടിലുള്ള മകനോട് കമ്പനിക്ക് എന്ത് പേര് നൽകണമെന്ന് ചോദിച്ചുള്ള വാട്സാപ്പ് സന്ദേശവും ഇ.ഡി. റിപ്പോർട്ടിൽ ഉൾപ്പെടുത്തിയിട്ടുണ്ട്. എന്നാൽ കമ്പനി യഥാർഥത്തിൽ തുടങ്ങിയോ എന്നതുമായി ബന്ധപ്പെട്ട കൂടുതൽ വിവരങ്ങൾ പോലീസിനെ അറിയിച്ചിട്ടില്ലെന്നാണ് റിപ്പോർട്ട്. അതേസമയം, പിണറായി വിജയന്റെ പേര് പറയാൻ ഇ.ഡി. വീണയെ ഭീഷണിപ്പെടുത്തിയെന്ന ആരോപണവുമായി പി.എ. മുഹമ്മദ് റിയാസ് രംഗത്തെത്തി. പിണറായി പറഞ്ഞിട്ടാണ് സി.എം.ആർ.എലും എക്സാലോജിക്കും തമ്മിലുള്ള പണമിടപാടെന്ന് മൊഴി നൽകാൻ വീണയെ ഇ.ഡി. നിർബന്ധിച്ചെന്നും തയ്യാറാകാതിരുന്നപ്പോൾ അറസ്റ്റ് ചെയ്യുമെന്ന് ഭീഷണിപ്പെടുത്തിയെന്നും റിയാസ് ആരോപിച്ചു.
സി.എം.ആർ.എലിന് എക്സാലോജിക് സേവനം നൽകിയില്ലെന്ന് വീണ മൊഴി നൽകിയിട്ടില്ലെന്നും ഇ.ഡി. അത് തെറ്റായി പ്രചരിപ്പിക്കുകയാണെന്നും റിയാസ് പറഞ്ഞു. താനും വീണയും പലതവണ ദുബായിൽ പോയിട്ടുണ്ടെങ്കിലും അത് ഹവാല പണം കടത്താനല്ലെന്നും അദ്ദേഹം വ്യക്തമാക്കി. അതേസമയം, പിണറായി വിജയൻ സി.എം.ആർ.എലിൽനിന്ന് കൈക്കൂലിയായി 3.28 കോടി രൂപ വാങ്ങിയെന്ന ഇ.ഡി.യുടെ കണ്ടെത്തലിനേക്കാൾ ഹവാല ഇടപാട് ആരോപണത്തിനാണ് സംസ്ഥാന സർക്കാർ കൂടുതൽ ഗൗരവം നൽകുന്നതെന്നാണ് റിപ്പോർട്ട്. ഇ.ഡി. നിരത്തിയ തെളിവുകൾ പോലീസ് വിശദമായി പരിശോധിക്കും. പണം എവിടെനിന്നാണ് എത്തിയതെന്നതും അന്വേഷണത്തിലെ പ്രധാന വിഷയമാകും. നിയമോപദേശത്തിന്റെയും ആഭ്യന്തര വകുപ്പിന്റെ പരിശോധനയുടെയും അടിസ്ഥാനത്തിലായിരിക്കും തുടർനടപടികൾ തീരുമാനിക്കുക. സി.എം.ആർ.എലും വീണയുടെ എക്സാലോജിക്കും തമ്മിൽ പേരിനെങ്കിലും കരാറുണ്ടെന്നിരിക്കെ, പ്രാഥമിക അന്വേഷണം നടത്തി കേസ് എടുക്കുന്നതും സർക്കാർ പരിഗണിക്കുന്നതായാണ് വിവരം.
