40,000-ത്തോളം പേർ പരീക്ഷയെഴുതിയ കേരള സർവകലാശാലാ അസിസ്റ്റന്റ് നിയമനത്തിൽ ക്രമക്കേട് നടന്നെന്ന കേസിൽ നിർണായക നീക്കം. മുൻ വൈസ് ചാൻസലർ, മുൻ പ്രോ വൈസ് ചാൻസലർ, മുൻ രജിസ്ട്രാർ, നാല് സിൻഡിക്കേറ്റ് അംഗങ്ങൾ എന്നിവരടക്കം ഏഴുപേർക്കെതിരെ പ്രോസിക്യൂഷൻ നടപടിയുമായി ക്രൈംബ്രാഞ്ച് മുന്നോട്ടുപോകുന്നു. അന്വേഷണം പൂർത്തിയാക്കി കുറ്റപത്രം സമർപ്പിക്കുന്നതിനുള്ള ഫയൽ ക്രൈംബ്രാഞ്ച് മേധാവിയായ എ.ഡി.ജി.പി. എച്ച്. വെങ്കിടേഷിന് കൈമാറിയിട്ടുണ്ട്. അദ്ദേഹത്തിന്റെ അംഗീകാരം ലഭിക്കുന്നതോടെ കേസ് വിജിലൻസ് കോടതിയിലെത്തും.
2008-ൽ നടന്ന നിയമനത്തിനായി നടത്തിയ പരീക്ഷയുടെ ഒ.എം.ആർ. ഉത്തരക്കടലാസുകൾ നശിപ്പിച്ചശേഷം അഭിമുഖത്തിലൂടെ സി.പി.എം. അനുഭാവികൾക്കും ഉന്നത ഉദ്യോഗസ്ഥരുടെ ബന്ധുക്കൾക്കും റാങ്ക് പട്ടികയിൽ മുൻതൂക്കം നൽകി നിയമനം നൽകിയെന്നാണ് ആരോപണം. കേസ് എഴുതിത്തള്ളണമെന്നാവശ്യപ്പെട്ട് മുൻ സർക്കാരിന്റെ കാലത്ത് ക്രൈംബ്രാഞ്ച് നൽകിയ റിപ്പോർട്ട് വിജിലൻസ് കോടതി അംഗീകരിച്ചിരുന്നില്ല. ഉത്തരക്കടലാസുകൾ കാണാതായ സംഭവത്തിൽ ഉത്തരവാദികളെ കണ്ടെത്താൻ മതിയായ തെളിവുകളില്ലെന്നായിരുന്നു റിപ്പോർട്ടിലെ വാദം. എന്നാൽ, പുനരന്വേഷണം നടത്താൻ വിജിലൻസ് കോടതി ജഡ്ജി ജി. ഗോപകുമാർ ഉത്തരവിട്ടതോടെയാണ് അന്വേഷണം വീണ്ടും സജീവമായത്.മുൻ വി.സി. ഡോ. എം.കെ. രാമചന്ദ്രൻ നായർ, മുൻ പി.വി.സി. ഡോ. വി. ജയപ്രകാശ്, മുൻ രജിസ്ട്രാർ കെ.എ. ഹാഷിം, സിൻഡിക്കേറ്റ് അംഗങ്ങളായിരുന്ന എ.എ. റഷീദ്, ബി.എസ്. രാജീവ്, കെ.എ. ആൻഡ്രൂ, എം.പി. റസ്സൽ എന്നിവർക്കെതിരെയാണ് പ്രോസിക്യൂഷൻ നടപടിക്ക് ശുപാർശ ചെയ്തിരിക്കുന്നത്. ഇവരിൽ സി.പി.എം. നേതാവായിരുന്ന ബി.എസ്. രാജീവ് ഇപ്പോൾ ജീവിച്ചിരിപ്പില്ല. റാങ്ക് പട്ടികയിൽ ഉൾപ്പെട്ട 160 പേരിൽ 110 പേരും തിരുവനന്തപുരം ജില്ലക്കാരായിരുന്നു. ഒരു വീട്ടിൽനിന്ന് രണ്ടുപേർക്ക് ജോലി ലഭിച്ച മൂന്ന് സംഭവങ്ങളും അന്വേഷണത്തിൽ ശ്രദ്ധയിൽപ്പെട്ടിരുന്നു. എഴുത്തുപരീക്ഷയ്ക്ക് 75 മാർക്കും അഭിമുഖത്തിന് 25 മാർക്കും നിശ്ചയിച്ച രീതിയിൽ, പരീക്ഷയിൽ മുന്നിലെത്തിയവർക്ക് അഭിമുഖത്തിൽ കുറഞ്ഞ മാർക്കും പിന്നിലുള്ളവർക്ക് ഉയർന്ന മാർക്കും നൽകിയതായും ആരോപണമുണ്ട്.
ഇൻവിജിലേറ്റർമാർ നൽകേണ്ട പരീക്ഷയെഴുതാത്തവരുടെ പട്ടികയ്ക്ക് പകരം പകർപ്പുകളാണ് അന്വേഷണത്തിൽ കണ്ടെത്തിയത്. പരീക്ഷയ്ക്ക് ഹാജരാകാത്തവരുടെ സ്ഥാനത്ത് താൽപര്യമുള്ളവരെ ഉൾപ്പെടുത്തിയതായും ക്രൈംബ്രാഞ്ച് കണ്ടെത്തിയിരുന്നു. 1,401 പേരുടെ റാങ്ക് പട്ടികയിൽനിന്ന് 181 പേർക്ക് നിയമനം ലഭിച്ചു; കേസിനെത്തുടർന്ന് ചിലർ ജോലി ഉപേക്ഷിക്കുകയും ചിലർ വിരമിക്കുകയും ചെയ്തു. നിലവിൽ 130 പേർ സർവീസിലുണ്ട്. നിയമന നടപടികളിലെ ക്രമക്കേടുകളെക്കുറിച്ച് തുടക്കംമുതൽ സംശയങ്ങളുണ്ടായിരുന്ന കേസിൽ, കുറ്റപത്രത്തിന് അനുമതി ലഭിക്കുന്നതോടെ തുടർനടപടികൾക്ക് വഴിതെളിയും.
