പിഎസ്‌സി പരീക്ഷാ തട്ടിപ്പ് കേസിൽ അന്വേഷണം ശക്തമാക്കി ക്രൈംബ്രാഞ്ച്. ക്രമക്കേടിൽ പങ്കുണ്ടെന്ന് കണ്ടെത്തിയതിനെ തുടർന്ന് രണ്ട് പിഎസ്‌സി ഉദ്യോഗസ്ഥരെക്കൂടി കേസിൽ പ്രതി ചേർക്കാൻ ക്രൈംബ്രാഞ്ച് തീരുമാനിച്ചു. ഇതിന് പുറമേ, വിശദമായ ചോദ്യം ചെയ്യലിനായി രണ്ട് പിഎസ്‌സി അംഗങ്ങൾക്ക് വീണ്ടും നോട്ടീസ് അയക്കാനും അന്വേഷണസംഘം നടപടികൾ ആരംഭിച്ചിട്ടുണ്ട്. ആസൂത്രണ ബോർഡ് പരീക്ഷാ ക്രമക്കേടുമായി ബന്ധപ്പെട്ട അന്വേഷണത്തെ ചോദ്യം ചെയ്തുകൊണ്ട് പിഎസ്‌സി നൽകിയ ഹർജി പരിഗണിക്കുന്നതിനിടെ കഴിഞ്ഞ ദിവസം ഹൈക്കോടതിയിൽ നിന്ന് സർക്കാരിന് രൂക്ഷവിമർശനം നേരിട്ടിരുന്നു.
പ്രധാന പ്രതിയെ ചോദ്യം ചെയ്യാതെ എന്ത് തരത്തിലുള്ള അന്വേഷണമാണ് നടക്കുന്നതെന്ന് കോടതി ചോദിച്ചു. അന്വേഷണവുമായി പിഎസ്‌സി സഹകരിക്കുന്നില്ലെന്ന് സർക്കാർ കോടതിയെ അറിയിച്ചപ്പോൾ, കൃത്യമായ ചട്ടങ്ങൾ പാലിക്കാതെയാണ് ക്രൈംബ്രാഞ്ചിന്റെ നീക്കമെന്നാണ് പിഎസ്‌സി വാദിച്ചത്. കേസ് ഈ മാസം 27-ലേക്ക് മാറ്റിവെച്ച കോടതി, ക്രൈംബ്രാഞ്ച് അന്വേഷണം റദ്ദാക്കണമെന്ന ഹർജിയിൽ നേരത്തെ പിഎസ്‌സിക്കെതിരെ കോടതിയെ സമീപിച്ച ഉദ്യോഗാർത്ഥിയെക്കൂടി കക്ഷിയാക്കാൻ ഉത്തരവിട്ടിട്ടുണ്ട്.
