വേണുഗോപാൽ വരുമോ? യുഡിഎഫിൽ സസ്പെൻസ്!

കേരളം കാത്തിരുന്ന ആ നിർണ്ണായക ദിനം അരികിലെത്തിക്കഴിഞ്ഞു! ഏപ്രിൽ 23-ന് നടന്ന വാശിയേറിയ വോട്ടെടുപ്പിന് ശേഷം, ഇനി എല്ലാവരുടെയും കണ്ണുകൾ മെയ് 4-ലേക്ക്… കൗണ്ടിങ് ഡേയുടെ ഓരോ സെക്കൻഡും നെഞ്ചിടിപ്പോടെയാണ് കേരളം കാത്തിരിക്കുന്നത്.
​ഇത്തവണത്തെ തിരഞ്ഞെടുപ്പ് വെറുമൊരു പോരാട്ടമല്ല, കേരള രാഷ്ട്രീയത്തിന്റെ ദിശ തന്നെ മാറ്റാൻ പോകുന്ന ഒന്നാണ്. പല മണ്ഡലങ്ങളിലും നടന്ന തീപാറുന്ന ത്രികോണ മത്സരങ്ങൾ ആർക്ക് അനുകൂലമാകും? എൽ.ഡി.എഫിന് വീണ്ടും ഒരു ഭരണത്തുടർച്ച ലഭിച്ച് ചരിത്രം കുറിക്കുമോ? അതോ യു.ഡി.എഫ് അധികാരം തിരിച്ചുപിടിക്കുമോ?
​വിജയസാധ്യതകൾക്കൊപ്പം തന്നെ രാഷ്ട്രീയ കേരളം ഇപ്പോൾ ഉറ്റുനോക്കുന്നത് മറ്റൊരു പ്രധാന ചർച്ചയിലേക്കാണ്… യു.ഡി.എഫ് അധികാരത്തിൽ വന്നാൽ ആരായിരിക്കും കേരളത്തിന്റെ അടുത്ത മുഖ്യമന്ത്രി? കഠിനാധ്വാനത്തിലൂടെ മുന്നണിയെ നയിച്ച വി.ഡി. സതീശന് പിന്നിൽ മുസ്ലിം ലീഗിന്റെ ശക്തമായ പിന്തുണയുണ്ടെന്ന വാർത്തകൾ പുറത്തുവരുമ്പോൾ, കോൺഗ്രസിനുള്ളിലെ മുഖ്യമന്ത്രി ചർച്ചകൾ ക്ലൈമാക്സിലേക്ക് നീങ്ങുകയാണ്.
​വി.ഡി. സതീശനോ അതോ അനുഭവസമ്പത്തുള്ള മറ്റ് മുതിർന്ന നേതാക്കളോ? കേരളത്തിന്റെ അടുത്ത അമരക്കാരൻ ആരായിരിക്കും?

               വോട്ടിംഗ് കഴിഞ്ഞ നിമിഷം മുതൽ യു.ഡി.എഫ് ക്യാമ്പുകളിൽ കാണുന്നത് ആത്മവിശ്വാസത്തിന്റെ വലിയൊരു തരംഗമാണ്. എന്നാൽ ആ ആത്മവിശ്വാസത്തിനൊപ്പം തന്നെ രാഷ്ട്രീയ കേന്ദ്രങ്ങളിൽ ഒരു ചോദ്യം പുകയുന്നുണ്ട്—ആരാകും മുഖ്യമന്ത്രി? 

മുതിർന്ന നേതാക്കളുടെ വലിയൊരു നിര തന്നെ കോൺഗ്രസിനുള്ളിൽ ഉള്ളതുകൊണ്ട് തന്നെ വോട്ടെടുപ്പ് ദിവസം മുതൽ ഈ ചർച്ച സജീവമാണ്.
​ഇവിടെ നമ്മൾ ശ്രദ്ധിക്കേണ്ട പ്രധാന ഘടകം യു.ഡി.എഫിലെ ഘടകകക്ഷികളെ കുറിച്ചാണ്. മുൻകാലങ്ങളിൽ ഘടകകക്ഷികൾക്ക്, പ്രത്യേകിച്ച് മുസ്ലിം ലീഗിന് അർഹമായ പരിഗണന ലഭിക്കുന്നില്ലെന്ന പരാതികളും പലപ്പോഴും അവരെ പരിഹസിക്കുന്ന തരത്തിലുള്ള നീക്കങ്ങളും ഉണ്ടായിട്ടുണ്ട്. എന്നാൽ ഇത്തവണ ചിത്രം മാറിയിരിക്കുന്നു. യു.ഡി.എഫിന്റെ മുഖ്യമന്ത്രിയെ നിശ്ചയിക്കുന്നതിൽ മുസ്ലിം ലീഗിന്റെ നിലപാട് അതീവ നിർണ്ണായകമാണ്.
​മലബാർ മേഖലയിൽ ഇത്തവണ യു.ഡി.എഫ് കാഴ്ചവെച്ച വലിയ മുന്നേറ്റമാണ് ഇതിന് കാരണം. മുസ്ലിം ലീഗിന്റെ സ്വാധീനത്തിനൊപ്പം തന്നെ അവിടുത്തെ വിവിധ സംഘടനകൾ ഇത്തവണ യു.ഡി.എഫിന് പിന്നിൽ ഉറച്ചുനിന്നു. ഇതിന്റെ വ്യക്തമായ സൂചനകൾ നമ്മൾ കഴിഞ്ഞ ലോക്സഭാ തിരഞ്ഞെടുപ്പിലും തദ്ദേശ തിരഞ്ഞെടുപ്പിലും കണ്ടതാണ്. എൽ.ഡി.എഫിൽ നിന്നും യു.ഡി.എഫിലേക്കുള്ള ഈ വോട്ട് ഷിഫ്റ്റിംഗ് തന്നെയാണ് യു.ഡി.എഫിന്റെ വിജയപ്രതീക്ഷയുടെ അടിത്തറ.
​മറ്റൊരു പ്രധാന കാര്യം ജനങ്ങളുടെ മനസ്സ് എന്താണ് എന്നതാണ്. ഇത് ഏതെങ്കിലും പി.ആർ (PR) ഏജൻസികൾ പടച്ചുവിടുന്ന ഹൈപ്പല്ല. സോഷ്യൽ മീഡിയയിൽ വരുന്ന വാർത്തകൾക്ക് താഴെ പൊതുജനങ്ങൾ രേഖപ്പെടുത്തുന്ന അഭിപ്രായങ്ങൾ നോക്കിയാൽ ഒരു കാര്യം വ്യക്തമാണ്—അത് വി.ഡി. സതീശന് അനുകൂലമായി വലിയ രീതിയിൽ ഗാൽവനൈസ് ചെയ്യപ്പെട്ടിരിക്കുന്നു. ഈ ജനവികാരം കണ്ടില്ലെന്ന് നടിക്കാൻ ഹൈക്കമാൻഡിന് അത്ര എളുപ്പമാകില്ല.
​ഹൈക്കമാൻഡിന്റെ രീതി നമ്മൾ ഇതിനു മുൻപും കണ്ടതാണ്. നിയമസഭാ സാമാജികരുടെ അഭിപ്രായം അവർ കേൾക്കുമെങ്കിലും അന്തിമ തീരുമാനം ഡൽഹിയിൽ നിന്നാകും. 2021-ലെ തിരഞ്ഞെടുപ്പിന് ശേഷം നമ്മൾ അത് കണ്ടതാണ്. ഉമ്മൻ ചാണ്ടിയും രമേശ് ചെന്നിത്തലയും പോലുള്ള അതികായന്മാർ മുന്നിലുണ്ടായിരുന്നിട്ടും, ഹൈക്കമാൻഡ് തിരഞ്ഞെടുത്തത് വി.ഡി. സതീശനെയായിരുന്നു. അന്ന് ഹൈക്കമാൻഡ് മുന്നോട്ടുവെച്ച ആ പേരിനെ നിഷേധിക്കാൻ നിയമസഭാ സാമാജികർക്കും കഴിഞ്ഞില്ല എന്നതും നമ്മളിവിടെ ശ്രദ്ദിക്കേണ്ട ഒരു കാര്യമാണ്. ഇത്തവണയും സമാനമായ ഒരു നീക്കം ഡൽഹിയിൽ നിന്ന് ഉണ്ടാകുമോ എന്നാണ് കേരളം ഉറ്റുനോക്കുന്നത്.”
മുഖ്യമന്ത്രി ചർച്ചകളിൽ സമുദായ സംഘടനകളുടെ നിലപാട് എത്രത്തോളം നിർണ്ണായകമാകും എന്നത് എപ്പോഴും പ്രസക്തമായ ചോദ്യമാണ്. കേരള രാഷ്ട്രീയത്തിൽ എൻ.എസ്.എസും എസ്.എൻ.ഡി.പിയും പുലർത്തുന്ന സ്വാധീനം ചെറുതല്ല. എന്നാൽ ഇത്തവണത്തെ പ്രത്യേകത, ഈ സംഘടനകളുടെ ആചാര്യന്മാർ വി.ഡി. സതീശനെതിരെ സ്വീകരിച്ച കർക്കശമായ നിലപാടുകൾ യഥാർത്ഥത്തിൽ അദ്ദേഹത്തിന് വലിയൊരു രാഷ്ട്രീയ മുൻതൂക്കമാണ് നൽകിയത് എന്നതാണ്.
​സതീശനെ പരസ്യമായി വെല്ലുവിളിക്കാനും ഭത്സിക്കാനും സമുദായ നേതാക്കൾ തയ്യാറായപ്പോൾ, ആ സമുദായങ്ങൾക്കുള്ളിലെ സാധാരണക്കാരായ ജനങ്ങളും പുറത്തുള്ളവരും സതീശന് അനുകൂലമായി ചിന്തിക്കുന്ന കാഴ്ചയാണ് നമ്മൾ കണ്ടത്.
‘സമുദായ നേതാക്കളുടെ തിണ്ണ നിരങ്ങാൻ താനില്ല’ എന്ന സതീശന്റെ ഒരൊറ്റ പ്രസ്താവന കേരളീയ പൊതുസമൂഹത്തിൽ വലിയ ചലനമുണ്ടാക്കി.
മുൻപ് പല നേതാക്കളും സമുദായ നേതാക്കളെ കണ്ട് അനുഗ്രഹം വാങ്ങാൻ ക്യൂ നിന്നപ്പോൾ, അതിൽ നിന്ന് വ്യത്യസ്തമായി തലയുയർത്തിപ്പിടിച്ചു നിന്ന സതീശന്റെ രീതി യുവാക്കൾക്കിടയിലും ന്യൂനപക്ഷങ്ങൾക്കിടയിലും വലിയ സ്വീകാര്യത നേടി.
​വെള്ളാപ്പള്ളി നടേശൻ നടത്തിയ ചില പ്രയോഗങ്ങൾ ഇതിന് ഉദാഹരണമായി പറയാം. മലപ്പുറത്തെ മുസ്ലീങ്ങളെയും മുസ്ലീം ലീഗിനെയും ലക്ഷ്യം വെച്ച് അദ്ദേഹം നടത്തിയ പ്രസ്താവനകൾ മലബാർ മേഖലയിൽ യു.ഡി.എഫിന് അനുകൂലമായ ഒരു വലിയ വികാരം സൃഷ്ടിച്ചു. സമുദായ സംഘടനകളുടെ തിട്ടൂരങ്ങൾക്ക് വഴങ്ങാത്ത ഒരു ധീരനായ നേതാവ് എന്ന പ്രതിച്ഛായ സതീശന് ലഭിക്കാൻ ഈ വെല്ലുവിളികൾ കാരണമായി. ചുരുക്കത്തിൽ, വെള്ളാപ്പള്ളി നടേശനും ജി. സുകുമാരൻ നായരും സതീശനെ തള്ളിക്കൊണ്ട് നടത്തിയ നീക്കങ്ങൾ തിരിച്ചടിച്ചത് അവർക്ക് തന്നെയാണ്.
​ഇനി എൽ.ഡി.എഫ് ക്യാമ്പിലേക്ക് നോക്കിയാൽ, പത്ത് വർഷം മുഖ്യമന്ത്രിയായിരുന്ന പിണറായി വിജയൻ ഇത്തവണ പരാജയപ്പെട്ടാൽ പ്രതിപക്ഷ നേതാവായി ഇരിക്കാൻ സാധ്യതയുണ്ടോ? ഭരണപക്ഷത്തെ മുഖ്യമന്ത്രി എന്ന നിലയിൽ അദ്ദേഹം പുലർത്തുന്ന ഗൗരവവും അന്തസ്സും ഒരു പ്രതിപക്ഷ നേതാവ് എന്ന നിലയിലുള്ള ചാടി എഴുന്നേറ്റുള്ള ചോദ്യം ചെയ്യലുകൾക്ക് എത്രത്തോളം വഴങ്ങും എന്നത് സംശയമാണ്. പ്രായവും അദ്ദേഹത്തിന്റെ ബോഡി ലാംഗ്വേജും ഇതിന് തടസ്സമായേക്കാം. വി.എസ്. അച്യുതാനന്ദൻ എന്ന പ്രതിപക്ഷ നേതാവ് സൃഷ്ടിച്ച ആ ഒരു പോരാട്ട വീര്യത്തിലേക്ക് പിണറായി വിജയൻ എന്ന നേതാവ് ഇരിക്കാൻ സാധ്യതയില്ല. പകരം, സി.പി.എമ്മിനുള്ളിൽ ഒരു ‘മാർഗ്ഗനിർദ്ദേശക മണ്ഡൽ’ പോലെ ഒരു സമിതി ഉണ്ടാക്കി അദ്ദേഹത്തെ ഒരു സീനിയർ റോളിലേക്ക് മാറ്റാനായിരിക്കും പാർട്ടി ശ്രമിക്കുക. അതായത്, ഭരണപക്ഷത്താണെങ്കിലും പ്രതിപക്ഷത്താണെങ്കിലും കേരള രാഷ്ട്രീയത്തിൽ ഇത്തവണ വലിയൊരു നേതൃമാറ്റം അനിവാര്യമായി വരികയാണ്
മുഖ്യമന്ത്രി ചർച്ചകൾ കൊഴുക്കുമ്പോഴും യു.ഡി.എഫിന് മുന്നിലുള്ളത് സങ്കീർണ്ണമായ ചില ചോദ്യങ്ങളാണ്. ഒരു വശത്ത് സമുദായ നേതാക്കളുടെ ‘തിണ്ണ നിരങ്ങില്ല’ എന്ന നിലപാടുകൾ വലിയ ചർച്ചയാകുന്നുണ്ടെങ്കിലും, എല്ലാ മത-സാമുദായിക വിഭാഗങ്ങളെയും ഒരുപോലെ വിശ്വാസത്തിലെടുക്കാതെ കേരളത്തിൽ ഭരണം മുന്നോട്ട് കൊണ്ടുപോകുക എന്നത് ഏതൊരു മുന്നണിക്കും വെല്ലുവിളിയാണ്. സമുദായ നേതാക്കളെ പരസ്യമായി എതിർക്കുന്ന ശൈലി ഒരു വിഭാഗം ജനങ്ങൾക്കിടയിൽ സ്വീകാര്യതയുണ്ടാക്കുമ്പോൾ തന്നെ, അത് പരമ്പരാഗത വോട്ട് ബാങ്കുകളിൽ വിള്ളലുണ്ടാക്കുമോ എന്ന ആശങ്കയും മുന്നണിക്കുള്ളിലുണ്ട്.
​ഇവിടെയാണ് രമേശ് ചെന്നിത്തല, വി.ഡി. സതീശൻ, കെ.സി. വേണുഗോപാൽ എന്നീ നേതാക്കളുടെ പ്രസക്തിയും അവരെ ചുറ്റിപ്പറ്റിയുള്ള ഗ്രൂപ്പ് സമവാക്യങ്ങളും നിർണ്ണായകമാകുന്നത്. രമേശ് ചെന്നിത്തലയെപ്പോലെ ദീർഘകാലത്തെ ഭരണപരിചയവും എല്ലാ വിഭാഗങ്ങളുമായും നല്ല ബന്ധവുമുള്ള ഒരു നേതാവിനെ മാറ്റിനിർത്തുക എന്നത് കോൺഗ്രസിനെ സംബന്ധിച്ചിടത്തോളം അത്ര എളുപ്പമുള്ള കാര്യമല്ല. അതുപോലെതന്നെ ഹൈക്കമാൻഡിന്റെ അതിവിശ്വസ്തനായ കെ.സി. വേണുഗോപാലിന്റെ സാന്നിധ്യം ഡൽഹിയിലെ തീരുമാനങ്ങളെ സ്വാധീനിച്ചേക്കാം.
​യു.ഡി.എഫിന്റെ വിജയത്തിൽ നിർണ്ണായക പങ്കുവഹിക്കുന്ന മുസ്ലിം ലീഗിന്റെ നിലപാടും ഇവിടെ പ്രധാനമാണ്. ഒരു വ്യക്തിയെ മാത്രം പിന്തുണയ്ക്കുന്നതിനേക്കാൾ, മുന്നണിയുടെ സുഗമമായ പ്രവർത്തനത്തിന് ആര് മുഖ്യമന്ത്രിയാകുന്നതാണ് ഉചിതം എന്നതാകും ലീഗിന്റെ നയതന്ത്രപരമായ സമീപനം. സമുദായ സംഘടനകളുടെ നേതൃത്വവുമായി കൊമ്പുകോർക്കുന്നത് ഭരണത്തിന്റെ തുടക്കത്തിൽ തന്നെ അനാവശ്യമായ പ്രതിസന്ധികൾ ഉണ്ടാക്കുമോ എന്ന് ഘടകകക്ഷികളും ചിന്തിക്കുന്നുണ്ടാകാം.
​ചുരുക്കത്തിൽ, വെറുമൊരു വ്യക്തിയുടെ താല്പര്യത്തിനപ്പുറം വരാനിരിക്കുന്ന ഭരണത്തിന്റെ സ്ഥിരതയും (Stability), ഘടകകക്ഷികൾക്കിടയിലെ ഐക്യവും, സമുദായ സംഘടനകളുമായുള്ള നീക്കുപോക്കുകളും പരിഗണിച്ചാകും യു.ഡി.എഫ് അതിന്റെ മുഖ്യമന്ത്രിയെ തീരുമാനിക്കുക. ഏതെങ്കിലും ഒരു നേതാവിനെ കേന്ദ്രീകരിച്ചുള്ള പി.ആർ വർക്കുകൾക്കോ സോഷ്യൽ മീഡിയ തരംഗങ്ങൾക്കോ അപ്പുറം, ഹൈക്കമാൻഡിന്റെ കൃത്യമായ രാഷ്ട്രീയ കണക്കുകൂട്ടലുകളാകും ഈ കൗണ്ടിങ് ദിനത്തിന് ശേഷം കേരളം കാണാൻ പോകുന്നത്.”
യു.ഡി.എഫിലെ മുഖ്യമന്ത്രി ചർച്ചകൾ മുറുകുമ്പോൾ പലരും ഉയർത്തുന്ന ഒരു ചോദ്യമുണ്ട്—ഇതൊരു നീതികേടല്ലേ? കഴിഞ്ഞ അഞ്ചുവർഷം പ്രതിപക്ഷ നേതാവായി മണ്ണും ചാരി നിന്നവൻ അവസാനം പെണ്ണും കൊണ്ടുപോയി എന്ന് പറയുന്നതുപോലെ, ഡൽഹിയിൽ നിന്നും കെ.സി. വേണുഗോപാൽ പറന്നിറങ്ങി മുഖ്യമന്ത്രി കസേര പിടിച്ചെടുക്കുമോ എന്നതാണ് ആ ചർച്ച. വേണുഗോപാൽ സാധാരണക്കാരനല്ല, കേന്ദ്രത്തിൽ ഇളകാത്ത അടിത്തറയുള്ള നേതാവാണ്. പക്ഷേ, കേരളത്തിലെ സാധാരണക്കാരായ കോൺഗ്രസ് പ്രവർത്തകർക്കിടയിൽ അദ്ദേഹം എത്രത്തോളം സ്വീകാര്യനാണെന്നത് ഇപ്പോഴും വലിയൊരു ചോദ്യചിഹ്നമാണ്.
​ഇവിടെയാണ് വി.ഡി. സതീശൻ എന്ന നേതാവിനെ ഉയർത്തിക്കാട്ടുന്ന പി.ആർ വർക്കുകളെ നാം ശ്രദ്ധിക്കേണ്ടത്. കോൺഗ്രസിനെ തകർച്ചയിൽ നിന്ന് രക്ഷിച്ചത് സതീശൻ എന്ന ഒറ്റയാൾ പോരാളിയാണെന്ന പ്രചാരണം എത്രത്തോളം സത്യവിരുദ്ധമാണ്? രമേശ് ചെന്നിത്തലയുടെ റോളും, സർക്കാരിനെതിരെയുള്ള ഭരണവിരുദ്ധ വികാരവും മറച്ചുവെച്ചുകൊണ്ട് ഒരു വ്യക്തിക്ക് മാത്രം ഈ ക്രെഡിറ്റ് നൽകുന്നത് രാഷ്ട്രീയ പാപ്പരത്തമല്ലേ? സതീശൻ അഞ്ചാം തവണ ജയിച്ചപ്പോൾ മാത്രമാണ് ഒരു ക്യാബിനറ്റ് പദവി ലഭിക്കുന്നത്. എന്നാൽ 28-ാം വയസ്സിൽ മന്ത്രിയായ, അഖിലേന്ത്യാ തലത്തിൽ പ്രതിച്ഛായയുള്ള രമേശ് ചെന്നിത്തലയെപ്പോലൊരു മുതിർന്ന നേതാവിനെ വെറും ‘അണ്ടർഡോഗ്’ ആയി കാണാൻ കോൺഗ്രസിനുള്ളിലെ ഒരു വിഭാഗം ശ്രമിക്കുന്നത് വരാനിരിക്കുന്ന വലിയ പൊട്ടിത്തെറികളുടെ സൂചനയാണ്.
​സമുദായ സംഘടനകളുമായുള്ള ബന്ധത്തിന്റെ കാര്യത്തിലും ഈ ഇരട്ടത്താപ്പ് പ്രകടമാണ്. സമുദായ നേതാക്കളെ അവഗണിക്കുന്നു എന്ന് പുറമേക്ക് തോന്നിപ്പിക്കുമ്പോഴും, സഭാ നേതാക്കളുടെയും മറ്റ് മതമേലധ്യക്ഷന്മാരുടെയും തിണ്ണ നിരങ്ങാൻ സതീശൻ മടിക്കാറില്ല എന്നതാണ് വാസ്തവം. ‘രണ്ടു കാലിൽ നടക്കലും’ ‘നിരങ്ങി നീങ്ങലും’ തമ്മിൽ വലിയ വ്യത്യാസമില്ല എന്ന് ജനങ്ങൾക്ക് മനസ്സിലാകുന്നുണ്ട്. ദശകങ്ങൾക്ക് മുൻപ് ആർ.എസ്.എസ് വേദിയിൽ പോയി വിളക്കു തെളിച്ച സതീശന്റെ ആ പഴയകാല ചിത്രങ്ങൾ ഇന്നും അദ്ദേഹത്തെ വേട്ടയാടുകയാണ്. സമുദായ ആചാര്യന്മാരായ വെള്ളാപ്പള്ളി നടേശനെയും ജി. സുകുമാരൻ നായരെയും പരസ്യമായി വെല്ലുവിളിക്കുന്നത് വെറും രാഷ്ട്രീയ സ്റ്റണ്ട് മാത്രമാണോ എന്ന് സംശയിക്കേണ്ടിയിരിക്കുന്നു. കാരണം, അധികാരത്തിലെത്താൻ ഏത് വാതിലിലും മുട്ടാൻ മടിക്കാത്ത ശൈലിയാണ് യു.ഡി.എഫ് നേതാക്കൾ കാലങ്ങളായി പിന്തുടരുന്നത്.
​ജനങ്ങളെ സംബന്ധിച്ചിടത്തോളം ഈ അധികാര വടംവലികൾ വെറും കാഴ്ചകൾ മാത്രമാണ്. ആര് മുഖ്യമന്ത്രിയായാലും ഗ്രൂപ്പ് വൈരങ്ങളും സമുദായ പ്രീണനങ്ങളും തുടർക്കഥയാകുമെന്ന് ഈ ചർച്ചകൾ അടിവരയിടുന്നു. അനുഭവസമ്പത്തുള്ള ചെന്നിത്തലയും, ഹൈക്കമാൻഡ് സ്വാധീനമുള്ള വേണുഗോപാലും, പി.ആർ ഹൈപ്പുള്ള സതീശനും തമ്മിലുള്ള ഈ മത്സരം യു.ഡി.എഫിനെ എവിടെ എത്തിക്കുമെന്ന് വരുംദിവസങ്ങളിൽ നമുക്കറിയാം.
“യു.ഡി.എഫ് ക്യാമ്പിലെ മുഖ്യമന്ത്രി ചർച്ചകൾ മുറുകുമ്പോൾ, മറുവശത്ത് പിണറായി വിജയൻ എന്ന രാഷ്ട്രീയ തന്ത്രജ്ഞന്റെ നിശബ്ദതയും ഏറെ ചർച്ച ചെയ്യപ്പെടേണ്ടതുണ്ട്. സത്യപ്രതിജ്ഞയ്ക്കായി പന്തൽ ഒരുക്കാൻ അദ്ദേഹം നിർദ്ദേശം നൽകിയെന്ന വാർത്തകൾ വെറുമൊരു ഭരണപരമായ നടപടിയാണോ, അതോ എൽ.ഡി.എഫിന്റെ കൈവശമുള്ള രഹസ്യ ഇന്റലിജൻസ് റിപ്പോർട്ടുകളുടെ അടിസ്ഥാനത്തിലുള്ള ആത്മവിശ്വാസമാണോ? വോട്ടെണ്ണൽ ദിവസം വരെ ഈ സസ്പെൻസ് നിലനിൽക്കും.
​യു.ഡി.എഫിനുള്ളിലേക്ക് വീണ്ടും നോക്കിയാൽ, മുസ്ലിം ലീഗിന്റെ നിലപാട് അതീവ നിർണ്ണായകമാണ്. സമുദായ സംഘടനകളുടെ തിട്ടൂരങ്ങൾക്ക് വഴങ്ങാത്ത ഒരു നേതാവ് എന്ന പ്രതിച്ഛായ സതീശൻ നിലനിർത്താൻ ശ്രമിക്കുമ്പോൾ, അത് ഭരണത്തിന്റെ സുഗമമായ പോക്കിനെ ബാധിക്കുമോ എന്ന ആശങ്ക ലീഗിനുണ്ട്. ഒരുപക്ഷേ, ആരെയും പിണക്കാത്ത, എല്ലാവരെയും ഒന്നിപ്പിച്ചു കൊണ്ടുപോകാൻ കഴിയുന്ന രമേശ് ചെന്നിത്തലയെപ്പോലൊരു നേതാവിനെയാകുമോ ലീഗ് ഒടുവിൽ പിന്തുണയ്ക്കുക? അതോ ഹൈക്കമാൻഡിന്റെ പ്രത്യേക താല്പര്യപ്രകാരം കെ.സി. വേണുഗോപാൽ എന്ന ‘ഡാർക്ക് ഹോഴ്സ്’ അധികാരത്തിലെത്തുമോ?
​ജനങ്ങളെ സംബന്ധിച്ചിടത്തോളം ഈ പേരും പെരുമയും അല്ല പ്രധാനം. വാഗ്ദാനങ്ങൾ പാലിക്കാനും ജനകീയ പ്രശ്നങ്ങൾ പരിഹരിക്കാനും ആർക്ക് സാധിക്കും എന്നതാണ്. അധികാരത്തിലെത്തുന്നതിന് മുൻപേ തന്നെ മുഖ്യമന്ത്രി കസേരയ്ക്കായി നടത്തുന്ന ഈ വടംവലികൾ ജനാധിപത്യത്തിന് ഗുണകരമാണോ എന്ന് വോട്ടർമാർ ചിന്തിക്കേണ്ടിയിരിക്കുന്നു.

​കേരള രാഷ്ട്രീയത്തിൽ ഇപ്പോൾ നടക്കുന്നത് വെറുമൊരു തിരഞ്ഞെടുപ്പ് ഫലത്തിനായുള്ള കാത്തിരിപ്പല്ല, മറിച്ച് വരാനിരിക്കുന്ന വലിയൊരു നേതൃമാറ്റത്തിന്റെ തുടക്കമാണ്. യു.ഡി.എഫ് അധികാരത്തിൽ വന്നാൽ പോലും, ഗ്രൂപ്പ് വൈരങ്ങൾക്കും സാമുദായിക സമവാക്യങ്ങൾക്കും ഇടയിൽ കേരളത്തിന്റെ മുഖ്യമന്ത്രി ആരാകുമെന്നത് ഒരു വലിയ സസ്പെൻസായി തന്നെ തുടരുന്നു. പാൻ-ഇന്ത്യ പ്രതിച്ഛായയുള്ള ചെന്നിത്തലയോ, ഹൈക്കമാൻഡ് കരുത്തനായ വേണുഗോപാലോ, അതോ പി.ആർ ഹൈപ്പിലൂടെ മുന്നേറുന്ന സതീശനോ? ഇതിൽ ആരായിരിക്കും ആ കസേരയിൽ ഇരിക്കുക എന്നത് ഡൽഹിയിൽ നിന്നുള്ള ആ അന്തിമ ദൂത് വരുന്നതുവരെ കാത്തിരുന്നു കാണേണ്ടി വരും.
​ജനങ്ങളുടെ വിധി എന്തായാലും, അത് അംഗീകരിക്കാൻ നേതാക്കൾ തയ്യാറാകണം. അധികാര മോഹത്തേക്കാൾ ജനസേവനത്തിന് മുൻഗണന നൽകുന്ന ഒരു നേതൃത്വം കേരളത്തിന് ഉണ്ടാകട്ടെ എന്ന് നമുക്ക് ആശംസിക്കാം