കേരളത്തിന്റെ ആരോഗ്യ മേഖലയ്ക്ക് ചരിത്രപരമായ വലിയൊരു കുതിച്ചുചാട്ടമാകുന്ന സന്തോഷവാർത്ത പുറത്തുവരുന്നു. സംസ്ഥാനത്തിന് പുതിയ എയിംസ് (AIIMS) അനുവദിക്കുമെന്ന് കേന്ദ്ര ആരോഗ്യമന്ത്രി ജെ.പി. നഡ്ഡ ഉറപ്പുനൽകിയതായി ആരോഗ്യ മന്ത്രി കെ. മുരളീധരൻ വ്യക്തമാക്കി. ഡൽഹിയിൽ കേന്ദ്രമന്ത്രിയുമായി നടത്തിയ നിർണ്ണായക കൂടിക്കാഴ്ചയിലാണ് കേരളത്തിന്റെ ആരോഗ്യ രംഗത്തെ ആവശ്യങ്ങൾക്ക് അനുകൂലമായ പ്രതികരണമുണ്ടായത്. തിരുവനന്തപുരത്തെ കെ.കരുണാകരൻ മെമ്മോറിയൽ ഗവ. മെഡിക്കൽ കോളേജിൽ അടുത്ത അധ്യയന വർഷം മുതൽ 100 എം.ബി.ബി.എസ് സീറ്റുകളിൽ പ്രവേശനം അനുവദിക്കാമെന്നും കേന്ദ്രം തത്വത്തിൽ അംഗീകരിച്ചിട്ടുണ്ട്.
കോടികൾ മുടക്കി പത്ത് വർഷം മുൻപ് കെട്ടിടങ്ങളും അടിസ്ഥാന സൗകര്യങ്ങളും ഒരുക്കിയിട്ടും പഠനം ആരംഭിക്കാൻ കഴിയാതെ പോയത് കുറ്റകരമായ അനാസ്ഥയാണെന്ന് ചൂണ്ടിക്കാണിച്ച മന്ത്രി, ഇതുവഴി നഷ്ടപ്പെട്ട അവസരങ്ങൾ ഇനി മുതൽ ലഭ്യമാകുമെന്ന് അറിയിച്ചു. കൂടാതെ, ഇന്ത്യയിൽ ആദ്യമായി ജനറ്റിക് ഇൻസ്റ്റിറ്റ്യൂട്ട് കേരളത്തിൽ ആരംഭിക്കുന്നതിനുള്ള പ്രൊപ്പോസൽ സമർപ്പിക്കാൻ കേന്ദ്രമന്ത്രി ആവശ്യപ്പെട്ടിട്ടുണ്ട്. സംസ്ഥാനത്തെ എല്ലാ ജില്ലകളിലും ജില്ലാ ആശുപത്രികൾ കേന്ദ്രീകരിച്ച് ട്രോമ കെയർ സെന്റർ ആരംഭിക്കാനുള്ള സഹായം, മൂന്ന് മെന്റൽ ഹെൽത്ത് സെന്ററുകളുടെ നിലവാരം ഉയർത്തൽ, പെൺകുട്ടികൾക്ക് എച്ച്.പി.വി വാക്സിൻ ലഭ്യമാക്കൽ എന്നിവയ്ക്കും കേന്ദ്ര സഹായം ഉറപ്പായിട്ടുണ്ട്.എൻ.എച്ച്.എമ്മിനുള്ള ഫണ്ട് വർദ്ധിപ്പിക്കുക, സാംക്രമികേതര രോഗങ്ങൾക്കും ചില പ്രത്യേക ക്യാൻസറുകൾക്കുമുള്ള മരുന്നുകൾ ലഭ്യമാക്കുക തുടങ്ങിയ ആവശ്യങ്ങളും കേന്ദ്രമന്ത്രിയുടെ ശ്രദ്ധയിൽപ്പെടുത്തിയിട്ടുണ്ട്. കേരളത്തിന്റെ ആരോഗ്യമേഖലയുടെ പ്രവർത്തനങ്ങളെ പ്രശംസിച്ച കേന്ദ്രമന്ത്രി എല്ലാ കാര്യങ്ങളിലും പോസിറ്റീവായ സമീപനമാണ് സ്വീകരിച്ചത്. കേരളത്തിന്റെ വികസന മുന്നേറ്റത്തിന് വലിയ മുതൽക്കൂട്ടാകുന്ന ഈ പ്രഖ്യാപനങ്ങൾ ഇതിനോടകം തന്നെ ജനശ്രദ്ധ ആകർഷിച്ചുകഴിഞ്ഞു
