രാജ്യത്ത് ഭർത്തൃപീഡനം നേരിടുന്ന സ്ത്രീകളുടെ എണ്ണത്തിൽ കുറവുണ്ടാകുമ്പോഴും കേരളത്തിൽ ഇതിന്റെ നിരക്ക് ആശങ്കാജനകമായ രീതിയിൽ ഇരട്ടിയായി വർദ്ധിച്ചെന്ന് കേന്ദ്ര ആരോഗ്യ-കുടുംബക്ഷേമ മന്ത്രാലയത്തിന്റെ ഏറ്റവും പുതിയ സർവേ വ്യക്തമാക്കുന്നു. കഴിഞ്ഞ ദിവസം പുറത്തുവന്ന ആറാം കുടുംബാരോഗ്യ സർവേ റിപ്പോർട്ട് പ്രകാരം, മുൻപ് കേരളത്തിൽ 9.8 ശതമാനമായിരുന്ന ഭർത്തൃപീഡന നിരക്ക് പുതിയ കണക്കുകളിൽ 17.7 ശതമാനമായാണ് ഉയർന്നത്. ഇതിൽ തന്നെ ഗർഭകാലത്ത് ഭർത്താക്കന്മാരിൽ നിന്ന് മർദനമേൽക്കേണ്ടി വരുന്ന സ്ത്രീകളുടെ നിരക്ക് 0.5 ശതമാനത്തിൽ നിന്നും 1.7 ശതമാനമായി ഉയർന്നു എന്ന ഞെട്ടിക്കുന്ന വിവരവും റിപ്പോർട്ടിലുണ്ട്.
അതേസമയം, ദേശീയതലത്തിൽ ഇത്തരം പീഡനങ്ങളുടെ നിരക്ക് 29.2 ശതമാനത്തിൽ നിന്നും 22.3 ശതമാനമായി കുറഞ്ഞിട്ടുണ്ട്. രാജ്യത്ത് നിലവിൽ ഏറ്റവും കൂടുതൽ ഭർത്തൃപീഡനം റിപ്പോർട്ട് ചെയ്യപ്പെടുന്നത് തെലങ്കാനയിലാണ് (30.8%). ഇന്ത്യയിലുടനീളം നഗരങ്ങളെ അപേക്ഷിച്ച് ഗ്രാമപ്രദേശങ്ങളിലാണ് മർദന നിരക്ക് കൂടുതൽ. കേരളത്തിലും ഈ പ്രവണത പ്രകടമാണ്. സംസ്ഥാനത്തെ നഗരങ്ങളിൽ പീഡന നിരക്ക് 15.6 ശതമാനമാണെങ്കിൽ ഗ്രാമപ്രദേശങ്ങളിൽ ഇത് 19.7 ശതമാനമായി ഉയർന്നുനിൽക്കുന്നു.
