തിരുവനന്തപുരം: ലൈംഗികാതിക്രമ പരാതിയിൽ അന്വേഷണം നേരിടുന്ന അസിസ്റ്റന്റ് മോട്ടോർ വെഹിക്കിൾ ഇൻസ്പെക്ടർ (എ.എം.വി.ഐ) ദിപിൻ ഇടവണ്ണയ്ക്കെതിരെ നടപടി വൈകുന്നതിൽ മോട്ടോർ വാഹന വകുപ്പിൽ കടുത്ത അതൃപ്തി. ഗുരുതരമായ ആരോപണങ്ങൾ നിലനിൽക്കെ, അടുത്ത മാസം ഒന്ന് മുതൽ അദ്ദേഹത്തിന് പുതിയ പോസ്റ്റിങ് നൽകിയതിനെതിരെ വകുപ്പിൽ ഒരു വിഭാഗം ജീവനക്കാർ തന്നെ രംഗത്തെത്തിയിട്ടുണ്ട്.
പ്രധാന ആരോപണങ്ങൾ:
ഉന്നത ഉദ്യോഗസ്ഥനെതിരെ അഴിമതി ആരോപണം: 2025 മെയ് മാസത്തിൽ മുൻ ഗതാഗത കമ്മീഷണറും എ.ഡി.ജി.പിയുമായ എസ്. ശ്രീജിത്തിനെതിരെ ടെലിവിഷൻ അഭിമുഖത്തിലൂടെയും സാമൂഹ്യമാധ്യമങ്ങളിലൂടെയും ദിപിൻ ഇടവണ്ണ അഴിമതി ആരോപണങ്ങൾ ഉന്നയിച്ചിരുന്നു. ഇതുമായി ബന്ധപ്പെട്ട് തന്നെ തേജോവധം ചെയ്തുവെന്ന് കാണിച്ച് എസ്. ശ്രീജിത്ത് നൽകിയ മാനനഷ്ടക്കേസ് തിരുവനന്തപുരം ചീഫ് ജുഡീഷ്യൽ മജിസ്ട്രേറ്റ് കോടതിയുടെ പരിഗണനയിലാണ്.
വിവിധ ഗുരുതര ആരോപണങ്ങളിൽ പ്രതിയായ ഉദ്യോഗസ്ഥനെതിരെ കർശന വകുപ്പുതല നടപടികൾ എത്രയും പെട്ടെന്ന് സ്വീകരിക്കണമെന്നാണ് വിവിധ കേന്ദ്രങ്ങളിൽ നിന്നും ഉയരുന്ന ശക്തമായ ആവശ്യം.
ലൈംഗികാതിക്രമ കേസ്: 2023-ൽ കണ്ണൂർ പൊന്ന്യം സ്വദേശിയായ യുവതി നൽകിയ പരാതിയുടെ അടിസ്ഥാനത്തിൽ കതിരൂർ പൊലീസ് ഇയാൾക്കെതിരെ കേസെടുത്ത് അന്വേഷണം നടത്തിവരികയാണ്. ഔദ്യോഗിക പദവി ദുരുപയോഗം ചെയ്ത് വാട്സാപ്പിലൂടെയും സാമൂഹ്യമാധ്യമങ്ങളിലൂടെയും അശ്ലീല സന്ദേശങ്ങൾ അയച്ചെന്നും, വഴങ്ങണമെന്ന് ആവശ്യപ്പെട്ട് നിരന്തരം ശല്യപ്പെടുത്തിയെന്നുമാണ് പരാതിയിലെ പ്രധാന ആരോപണം.
വിജിലൻസ് അന്വേഷണം: സർക്കാർ സർവീസിലിരിക്കെ അനധികൃതമായി കോച്ചിങ് സെന്ററുകളും പി.എസ്.സി പരിശീലന സ്ഥാപനങ്ങളും നടത്തിയെന്ന പരാതിയിൽ വിജിലൻസ് ആൻഡ് ആന്റി കറപ്ഷൻ ബ്യൂറോയുടെ അന്വേഷണവും അദ്ദേഹത്തിനെതിരെ പുരോഗമിക്കുന്നുണ്ട്.
